ນາງ ມຸກດາ ອາຍຸ 42 ປີ ຢູ່ ບ້ານຈັນສະຫວ່າງ ເມືອງສີໂຄດຕະບອງ ແລະ ທ້າວ ສົມລິດ ຫຼື ລິດ ອາຍຸ 37 ປີ ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ ເຄື່ອນໄຫວຊື້-ຂາຍຢາບ້າມາ ແຕ່ປີ 2018 ໂດຍຊື້-ຂາຍນໍາກັນເປັນຈໍານວນຫຼາຍຄັ້ງ ຈົນເປັນເປົ້າໝາຍຕິດຕາມຕົວຂອງເຈົ້າໜ້າທີ່ ປກສ ເມືອງນາຊາຍທອງ, ຜ່ານການເຄື່ອນໄຫວມາຮອດເດືອນກຸມພາ 2019 ກໍສາມາດຈັບພວກກ່ຽວໄດ້ທັງ 2 ຄົນ ພ້ອມຢາບ້າ 700 ກວ່າເມັດ.
ຄະດີດັ່ງກ່າວໄດ້ເປີດເຜີຍໂດຍເຈົ້າໜ້າທີ່ ປກສ ເມືອງນາຊາຍທອງ ໃນວັນທີ 11 ກໍລະກົດ 2019 ວ່າ: ນາງ ມຸກດາ ໄດ້ເລີ່ມຊື້-ຂາຍຢາບ້າມາແຕ່ເດືອນມິຖຸນາ 2018 ໂດຍຊື້ຄັ້ງລະ 20-30 ເມັດ, ຕໍ່ມາໄດ້ຮູ້ຈັກກັບ ທ້າວ ໝູ ອາຍຸ 23 ປີ ຢູ່ບ້ານໜອງດ້ວງ ເມືອງສີໂຄດຕະບອງ ທີ່ເຄື່ອນໄຫວຄ້າຂາຍຢາບ້າ ແລະ ໄດ້ຕິດຕໍ່ຊື້-ຂາຍນໍາທ້າວ ໝູ, ຈຳນວນຫຼາຍຄັ້ງ ໂດຍຊື້ຄັ້ງລະ 200-600 ເມັດ ແລ້ວເອົາໄປຂາຍໃຫ້ ທ້າວ ລິດ ອາຍຸ 37 ປີ ບ້ານສີເກີດ ເມືອງນາຊາຍທອງ ຄັ້ງລະ 20-50 ເມັດ ແລະ ຂາຍໃຫ້ ນາງ ຕິກ ອາຍຸ 23 ປີ ບ້ານຈັນສະຫວ່າງ ຈໍານວນ 10 ທັ້ງໆລະ 20-50 ເມັດ.
ນອກນັ້ນ, ຜູ້ກ່ຽວຍັງໄດ້ຂາຍໃຫ້ພວກມົ້ວສຸມຢາບ້າຢູ່ເຂດບ້ານສີເກີດ ແລະ ບ້ານໃກ້ຄຽງ ຫຼາຍຄັ້ງ ຂາຍຄັ້ງລະ 3-10 ເມັດ, ມາຮອດວັນທີ 19 ກຸມພາ 2019 ໄດ້ຊື້ຢາບ້ານໍາ ທ້າວ ໝູ ຈໍານວນ 1.000 ເມັດ ແລ້ວໄປຂາຍໃຫ້ ທ້າວ ລິດ ຈໍານວນ 50 ເມັດ ແລະ ຂາຍໃຫ້ ນາງ ຕິກ ຈໍານວນ 50 ເມັດ, ມາຮອດເວ ລາ 12:00 ໂມງ ຂອງວັນທີ 26 ກຸມພາ 2019 ກໍຖືກເຈົ້າໜ້າທີ່ຕໍາຫຼວດ ປກສ ເມືອງສີໂຄດຕະບອງ ເຂົ້າຈັບຕົວໄດ້ຄາເຮືອນ ໃນຂະນະທີ່ກຳລັງຈະນຳຢາບ້າໄປສົ່ງໃຫ້ຜູ້ສັ່ງຊື້ພ້ອມຢາບ້າ 650 ເມັດ.
ສ່ວນ ທ້າວ ສົມລິດ ສາລະພາບວ່າ: ເລີ່ມເສບຢາບ້າມາແຕ່ປີ 2016, ສ່ວນຢາບ້າທີ່ຊື້ມາເສບ ແມ່ນຊື້ນໍາ ທ້າວ ເຈັກ ອາຍຸ 37 ປີ ບ້ານຈັນສະຫວ່າງ ເມືອງສີໂຄດຕະບອງ ຜ່ານມາເຄີຍຊື້ຢາບ້ານໍາທ້າວ ເຈັກ ປະມານ 10 ຄັ້ງ ຄັ້ງລະ 30-50 ເມັດ, ແລ້ວນໍາເອົາຢາບ້າມາເສບຄັ້ງລະ 2 ເມັດ ແລະ ເອົາໄປຂາຍໃຫ້ ທ້າວ ສອນ ອາຍຸ 38 ປີ ບ້ານສີເກີດ ເມືອງນາຊາຍທອງ 10 ຄັ້ງ, ທ້າວ ພອນ ອາຍຸ 35 ປີ ບ້ານສີເກີດ ຈໍານວນ 5 ຄັ້ງ ແລະ ທ້າວ ບຸນທະວີ ອາຍຸ 28 ປີ ບ້ານສີເກີດ ເມືອງນາຊາຍທອງ ຈໍານວນ 10 ຄັ້ງ ຄັ້ງລະ 2-3 ເມັດ ເພື່ອເອົາໄປເສບ.
ມາຮອດເດືອນຕຸລາ 2018 ຜູ້ກ່ຽວໄດ້ໄປຊື້ຢາບ້ານໍາ ນາງ ມຸກດາ ຊື້ຈໍານວນ 15 ຄັ້ງ ຄັ້ງລະ 30 -50 ເມັດ, ແລ້ວໄປຂາຍໃຫ້ແກ່ໄວລຸ້ນທີ່ຕ້ອງການຊື້ເສບຢູ່ບ້ານສີເກີດ ຈໍານວນຫຼາຍໆຄັ້ງ ບໍ່ສາມາດໄດ້ຂາຍຄັ້ງລະ 2-3 ເມັດ ແລະ ຂາຍໃຫ້ ທ້າວ ແພ ອາຍຸ 25 ປີ ບ້ານສີເກີດ ຂາຍຈໍານວນຫຼາຍໆຄັ້ງ ຄັ້ງລະ 2-3 ເມັດ ມາຮອດວັນທີ 26 ກຸມພາ 2019 ເວລາ 8:30 ໂມງ ຜູ້ກ່ຽວໄດ້ຊື້ຢາບ້ານໍາ ທ້າວ ເຈັກ ຈໍານວນ 130 ເມັດ ຫຼັງຈາກໄດ້ຢາບ້າມາແລ້ວໄດ້ຂາຍໃຫ້ ທ້າວ ແພ ຈໍານວນ 5 ເມັດ ແລະ ເສບຈໍານວນ 2 ເມັດ ຮອດເວລາ 10:00 ໂມງ ວັນດຽວກັນ ຖືກເຈົ້າໜ້າທີ່ກັກຕົວ ພ້ອມຢາບ້າ ຈໍານວນ 123 ເມັດ.
