ສກຂ ຫຼວງພະບາງ ເຊັນສັນຍາ ຮ່ວມ ບໍລິສັດທີ່ຊະນະການປະມູນໂຄງການກໍ່ສ້າງຫໍພັກນັກຮຽນ ຍິງ-ຊາຍ ມ.ຕົ້ນ ເດັກກໍ່າພ້າ
ພະແນກສຶກສາທິການ ແລະ ກິລາແຂວງຫຼວງພະບາງ ເຊັນສັນຍາ ກັບບໍລິສັດວິລະໄຊກໍ່ສ້າງເຄຫາສະຖານ ແລະ ສ້ອມແປງຈຳກັດ ທີ່ຊະນະການປະມູນ ໂຄງການກໍ່ສ້າງຫໍພັກນັກຮຽນ ຍິງ-ຊາຍ ໂຮງຮຽນມັດທະຍົມຕອນຕົ້ນ ເດັກກໍ່າພ້າ ແຂວງຫຼວງພະບາງ. ພິທີເຊັນສັນຍາດັ່ງກ່າວ,ໄດ້ມີຂື້ນເມື່ອວັນທີ 5 ມິຖຸນາ 2020 ຜ່ານມາ ທີ່ພະແນກດັ່ງກ່າວ ໂດຍການເຂົ້າເຮົາເຊັນລົງນາມຂອງທ່ານ ອະນຸແພງ ແກ້ວວົງສາ ຮອງຫົວໜ້າພະແນກສຶກສາທິການ ແລະ ກິລາແຂວງ, ທ່ານ ຈັນທີ ອິນທິສັກ ຜູ້ອຳນວຍການ ບໍລິສັດວິລະໄຊກໍ່ສ້າງເຄຫາສະຖານ ແລະ ສ້ອມແປງຈຳກັດ ເຂົ້າຮ່ວມເປັນສັກຂີພີຍານມີ ທ່ານ ວັນທອງ ແພງສະຫວັດ ຫົວໜ້າຂະແໜງບໍລິຫານ, ທ່ານຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານ ວິຊາການກ່ຽວຂ້ອງເຂົ້າຮ່ວມ.
ສົກປີ 2020 ພະແນກສຶກສາທິການ ແລະ ກິລາແຂວງຫຼວງພະບາງໄດ້ຮັບອະນຸມັດງົບປະມານໃນການກໍ່ສ້າງຫໍພັກນັກຮຽນ ຍິງ-ຊາຍ ໂຮງຮຽນມັດທະຍົມຕອນຕົ້ນ ເດັກກໍ່າພ້າ ມູນຄ່າການກໍ່ສ້າງທັງໝົດ 330 ລ້ານກວ່າກີບ, ມາຮອດວັນທີ 8 ພຶດສະພາ 2020 ພະແນກສຶກສາທິການ ແລະ ກິລາແຂວງໄດ້ຈັດຕັ້ງການປະມູນ ເຫັນວ່າ ບໍລິສັດດັ່ງກ່າວ ເປັນບໍລິສັດທີ່ມີຄວາມພ້ອມ, ມີຄຸນສົມບັດ, ຖືກຕ້ອງຕາມລະບຽບຫຼັກການ ແລະ ເປັນຜູ້ທີ່ຊະນະການປະມູນຄັ້ງນີ້, ເຊິ່ງ ໂຄງການກໍ່ສ້າງດັ່ງກ່າວ ແມ່ນມີໄລຍະເວລາ 11 ເດືອນ ຫຼື 330 ວັນ ໂດຍຈະເລີ່ມລົງມືກໍ່ສ້າງ ວັັນທີ 5 ມິຖຸນາ 2020 ຫາວັນທີ 5 ພະຈິກ 2020 ແມ່ນໃຫ້ສຳເລັດ 100%.
ໃນພິທີ, ໄດ້ຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງ ສະບັບເລກທີ 24/ຈຂ.ຫຼບ ວ່າດ້ວຍການເຫັນດີຮັບຮອງເອົາບໍລິສັດວິລະໄຊກໍ່ສ້າງເຄຫາສະຖານ ແລະ ສ້ອມແປງຈຳກັດ ທີ່ຊະນະການປະມູນ ໂຄງການກໍ່ສ້າງຫໍພັກນັກຮຽນ ຍິງ-ຊາຍ ໂຮງຮຽນມັດທະຍົມຕອນຕົ້ນ ເດັກກໍ່າພ້າ ແຂວງຫຼວງພະບາງ ຕອນທ້າຍຂອງພິທີ ທ່ານ ອະນຸແພງແກ້ວວົງສາ ໄດ້ເນັ້ນໜັກຫຼາຍບັນຫາ ເປັນຕົ້ນແມ່ນຄະນະຮັບຜິດຊອບທຸກພາກສ່ວນຈົ່ງໄດ້ມີຮ່ວມມືກັນໃນທຸກໆດ້ານໂດຍສະເພາະຂອດການປະສານງານໃນແຕ່ລະໜ້າວຽກ ພ້ອມກັນເຮັດຫຼອນໜ້າທີເຮັດໃຫ້ໂຄງການດັ່ງກ່າວມີຜົນສຳເລັດຄາດໝາຍທີ່ວາງໄວ້.
ໂດຍ: ແຈັກກີ້ ສກຂ ຫຼວງພະບາງ
