ເນື່ອງຈາກສະພາບການຂອງການຜະລິດຢູ່ພາຍໃນປະເທດ ໄດ້ຮັບຜົນກະທົບຈາກໄພພິບັດ ເຮັດໃຫ້ຜົນຜະລິດຂອງປະຊາຊົນບັນດາເຜົ່າ ໄດ້ຮັບການເສຍຫາຍຢ່າງຫຼວງຫຼາຍ ເຮັດໃຫ້ລາຄາສິນຄ້າຢູ່ຕາມທ້ອງຕະຫຼາດມີການເໜັງຕີງ ແລະ ກຸ່ມຄົນທີ່ສວຍໃຊ້ໂອກາດຂຶ້ນລາຄາສິນຄ້າ. ສະນັ້ນ, ເພື່ອຕອບສະ ໜອງດ້ານສະບຽງອາຫານໃຫ້ແກ່ປະຊາຊົນບັນດາເຜົ່າໄດ້ບໍລິໂພກສິນຄ້າ ໂດຍສະເພາະແມ່ນເຂົ້າໃນລາຄາຖືກ ແຂວງບໍລິຄຳໄຊ ເປີດບໍລິການຂາຍເຂົ້າລາຄາຖືກ ເພື່ອມາແຊກແຊງລາຄາເຂົ້າຢູ່ຕາມທ້ອງຕະຫຼາດທີ່ມີລາຄາແພງນັບມື້ນັບສູງຂຶ້ນ.
ພິທີເປີດຈຸດຂາຍເຂົ້າ ໄດ້ຈັດຂຶ້ນໃນ ວັນທີ 30 ກັນຍາ 2019 ຢູ່ຕໍ່ໜ້າອາຄານຫ້ອງການນັກທຸລະກິດໜຸ່ມ ບ້ານສີວິໄລ ເມືອງປາກຊັນ ໂດຍການເຂົ້າຮ່ວມເປັນປະທານຂອງທ່ານ ພົນຈັດຕະວາ ຈວງຈັນ ລາດຊະວົງ, ຫົວໜ້າການເມືອງກອງບັນຊາການທະຫານແຂວງ, ທ່ານ ບຸນເພັງ ໄຊສົງຄາມ ຮັກສາການຫົວໜ້າພະແນກອຸດສາຫະກຳ ແລະ ການຄ້າ, ທ່ານ ໄຊຍະເພັດ ຈັນທິສອນ ປະທານສະພາການຄ້າ ແລະ ອຸດສາຫະກຳ ແຂວງບໍລິຄຳໄຊ ພ້ອມດ້ວຍສະມາຄົມນັກທຸລະກິດໜຸ່ມແຂວງ ເຂົ້າຮ່ວມ.
ເຊິ່ງຈຸດຂາຍເຂົ້າມີທັງໝົດ 3 ຈຸດ ຄື: ຈຸດທີ 1 ຕັ້ງຢູ່ສຳນັກງານນັກທຸລະກິດໜຸ່ມແຂວງ ແຄມທາງເລກທີ 13 ໃຕ້ ໃກ້ກັບສົ້ນຂົວນ້ຳຊັນ, ຈຸດທີ 2 ຢູ່ຫ້ອງການສະຖານີຂົນສົ່ງໂດຍສານທາງແບ່ງວຽງຄຳ ເມືອງປາກກະດິງ ແລະ ຢູ່ຕະຫຼາດບ້ານເວີນທາດ ເມືອງທ່າພະບາດ ແຂວງບໍລິຄຳໄຊ, ສຳລັບເຂົ້າສານໜຽວ ແມ່ນ 6.800 ກີບຕໍ່ໜຶ່ງກິໂລ ແລະ ເຂົ້າສານຈ້າວ 4.800 ກີບຕໍ່ໜຶ່ງກິໂລ.
