ປັດຈຸບັນ, ບັນຫາຂີ້ລັກ, ງັດແງະ ແມ່ນປະກົດການຫຍໍ້ທໍ້ໜຶ່ງທີ່ພົ້ນເດັ່ນ ໃນສັງຄົມ, ເຮັດໃຫ້ບໍ່ມີຄວາມສະຫງົບ ແລະ ຄວາມບໍ່ເປັນລະບຽບຮຽບຮ້ອຍ; ບັນຫາດັ່ງກ່າວນີ້, ເຈົ້າໜ້າທີ່ ໄດ້ເອົາໃຈໃສ່ສະກັດກັ້ນ ແລະ ປາບປາມ ໃຫ້ຫຼຸດໜ້ອຍຖອຍລົງເລື້ອຍໆ, ເຊິ່ງສະແດງໃຫ້ເຫັນໃນຫຼາຍຄະດີທີ່ ເຈົ້າໜ້າທີ່ ສາມາດແກ້ໄຂໄດ້ ເຊັ່ນ: ຄະດີ ລັກລົດຈັກ ດັ່ງຕໍ່ໄປນີ້.
ໃນວັນທີ 16 ພຶດສະພາ 2019, ເຈົ້າໜ້າທີ່ ປກສ ເມືອງຈັນທະບູລີ ນະຄອນຫຼວງວຽງຈັນ ສາມາດກັກຕົວ ທ້າວ ພອນປະສິດ ຫຼື ຕິກ ອາຍຸ 19 ປີ, ຢູ່ບ້ານວັງຊາຍ, ເມືອງໄຊເສດຖາ ທີ່ປີນເຂົ້າຮ້ານປະດັບຍົນ ຢູ່ເຂດບ້ານໂພນທັນ ເມືອງໄຊເສດຖາ ກ່ອນລັກເອົາເງິນ ແລະ ລົດຈັກໜີໄປ ແຕ່ເຈົ້າໜ້າທີ່ສາມາດຕິດຕາມຈັບຕົວ ໃນຂະນະທີ່ພວມຊື້ – ຂາຍລົດຈັກທີ່ລັກມານັ້ນ ຢູ່ແຄມທາງບ້ານໜອງປີງ.
ຜ່ານການສອບສວນ, ທ້າວ ຕິກ ( ຜູ້ກໍ່ເຫດ ປີນເຂົ້າຮ້ານ ) ຮັບສາລະພາບວ່າ:
ເວລາ 24:00 ໂມງ ໃນວັນທີ 13 ເມສາ 2019, ໝູ່ມາຊວນໄປລັກເອົາຊັບສິນ ຢູ່ຮ້ານປະດັບຍົນຂອງ ທ້າວ ຊຸນນະວັດ ອາຍຸ 38 ປີ ສັນຊາດໄທ ທີ່ມາເຊົ່າເຮືອນເປີດຮ້ານປະດັບຍົນ ຢູ່ເຂດບ້ານໂພນທັນ ເມືອງໄຊເສດຖາ ຍ້ອນວ່າ ເຈົ້າຂອງຮ້ານ ໄດ້ກັບຄືນ ປະເທດໄທ.
ພໍໄປຮອດຮ້ານຂອງ ຜູ້ເສຍຫາຍ, ຕົນເອງໄດ້ປີນເຂົ້າຊ່ອງລົມຮ້ານ ແລ້ວປີນລົງທາງເພດານ; ຫຼັງຈາກນັ້ນ, ກໍໄດ້ອອກໄຂໜ້າຮ້ານໃຫ້ ທ້າວ ກໍ ທີ່ລໍຖ້າຢູ່ຂ້າງນອກ ເຂົ້າມາເພື່ອຄົ້ນຫາຊັບສິນ ພາຍໃນຮ້ານ.
ຫຼັງຈາກຄົ້ນພາຍໃນຮ້ານ ກໍພົບເຫັນເງິນໃນຫ້ອງນອນ ຈໍານວນ 3.000.000 ກີບ ແລະ 10.000 ບາດ ພ້ອມທັງລັກເອົາລົດຈັກ ຄຣິກໄອ໌ ສີດໍາ ຈໍານວນ 1 ຄັນ ໝາຍເລກທະບຽນ ຈສ 8898 ກໍາແພງນະຄອນ ທີ່ຈອດປະໄວ້ຢູ່ໃນຮ້ານ.
ທ້າວ ພອນປະສິດ ຫຼື ຕິກ ອາຍຸ 19 ປີ – ທ້າວ ວິລະໄຊ ຫຼື ປີ ອາຍຸ 25 ປີ
ຈາກນັ້ນ, ຕົນເອງກັບໝູ່ ໄດ້ພາກັນຂີ່ລົດຈັກອອກໄປ ເພື່ອຈະກັບບ້ານ ພໍຮອດເຂດປ່າແຫ່ງໜຶ່ງທີ່ບໍ່ມີບ້ານຄົນ ທ້າວ ກໍ ໄດ້ແກະປ້າຍລົດຄັນດັ່ງກ່າວ ຖິ້ມເຂົ້າປ່າ ແລ້ວປັນເງິນທີ່ລັກມາໄດ້ຄົນລະເຄິ່ງ; ຫຼັງຈາກໄດ້ເງິນມາ, ຕົນເອງ ກໍເອົາເງິນໄປຊື້ຢາບ້າ ມາເສບ, ຫຼິ້ນເກມ, ຊື້ເຫຼົ້າ – ເບຍຈົນໝົດ; ສ່ວນລົດຈັກຄັນດັ່ງກ່າວ ຕົນເອງ ເປັນຄົນເອົາໄວ້ ເພື່ອລໍຖ້າຂາຍໃຫ້ຜູ້ທີ່ຕ້ອງການຊື້.
· ຕໍ່ມາ, ຕົນເອງ ໄດ້ຕິດຕໍ່ໃຫ້ ທ້າວ ວິລະໄຊ ຫຼື ປີ ອາຍຸ 25 ປີ, ຢູ່ບ້ານເມືອງນ້ອຍ, ເມືອງໄຊເສດຖາ ເອົາລົດຄັນດັ່ງ ໄປຂາຍໃຫ້;
· ມາຮອດວັນທີ 16 ພຶດສະພາ 2019 ເວລາ 15:30 ໂມງ, ທ້າວ ປີ ໄດ້ໂທຫາວ່າ ມີຜູ້ຕ້ອງການຊື້ລົດຈັກ, ແລ້ວນັດສົ່ງລົດກັນ ຢູ່ທີ່ແຄມທາງ ເຂດບ້ານໜອງປີງ ເມືອງຈັນທະບູລີ;
· ພໍຮອດເວລາປະມານ 16:00 ໂມງ, ຕົນ ແລະ ທ້າວ ປີ ກໍາລັງລົມເລື່ອງການຊື້ – ຂາຍ ລົດຈັກຄັນດັ່ງກ່າວ ກັບ ຜູ້ຕ້ອງການຊື້ ຢູ່ແຄມທາງ ເຂດບ້ານໜອງປີງ ກໍຖືກ ເຈົ້າໜ້າທີ່ ປກສ ກຸ່ມ ບ້ານໜອງທາ ເມືອງຈັນທະບູລີ ເຂົ້າກັກຕົວ ພ້ອມກັບ ທ້າວ ປີ ໄດ້ກ່ອນ.
ເຈົ້າໜ້າທີ່ ປກສ ເມືອງຈັນທະບູລີ ໃຫ້ຮູ້ວ່າ:
ພາຍຫຼັງກັກຕົວພວກກ່ຽວ ທັງສອງແລ້ວ, ເຈົ້າໜ້າທີ່ ໄດ້ສອບສວນຂະຫຍາຍຜົນ ຈົນສາມາດຮູ້ໄດ້ວ່າ: ລົດຈັກ ຄຣິກໄອ໌ ສີດໍາ ໝາຍເລກທະບຽນ ຈສ 8898 ກໍາແພງນະຄອນ ແມ່ນເປັນຂອງ ບໍລິສັດ ເກັ່ງປະດັບຍົນ.
ພ້ອມກັນນັ້ນ, ເຈົ້າໜ້າທີ່ ຍັງສາມາດເກັບກູ້ຄືນ ລົດຈັກ ໄດ້ອີກ 1 ຄັນ ເຊິ່ງເປັນ ລົດຈັກ ເວບ 100 ສີແດງດໍາ ໝາຍເລກທະບຽນ ຍນ 8588 ກໍແພງນະຄອນ ເປັນຂອງ ທ້າວ ສຸລະສິດ, ບ້ານດອນແດງ, ເມືອງຈັນທະບູລີ ທີ່ ທ້າວ ປີ ຮັບຈາກໝູ່ອີກຄົນທີ່ລັກມາ ແລ້ວນໍາມາຂາຍຕໍ່ໃຫ້ ປະຊາຊົນ ຢູ່ບ້ານຮ່ອງແຊງ, ເມືອງຈັນທະບູລີ ໃນລາຄາ 6.500 ບາດ ແລ້ວຕົນເອງ ໄດ້ຄ່າຂາຍ ຈໍານວນ 1.500 ບາດ.
ມາຮອດວັນທີ 25 ກໍລະກົດ 2019, ເຈົ້າໜ້າທີ່ ປກສ ເມືອງຈັນທະບູລີ ໄດ້ມອບລົດຈັກທີ່ເກັບກູ້ຄືນໄດ້ ຈາກ ທ້າວ ຕິກ ແລະ ທ້າວ ປີ ທີ່ຂາຍໃຫ້ກັບ ຜູ້ທີ່ຕ້ອງການຊື້ ຈໍານວນ 2 ຄັນ ຄື:
1. ລົດຈັກ ຄຣິກໄອ໌ ສີດໍາ ໝາຍເລກທະບຽນ ຈສ 8898 ກໍາແພງນະຄອນ
2. ລົດຈັກ ເວບ 100 ສີແດງດໍາ ໝາຍເລກທະບຽນ ຍນ 8588 ກໍແພງນະຄອນ
ຕາງໜ້າມອບໂດຍ ພັຕ ນາງ ສົມມະນີ ອຸດວງວິໄລ ຮອງຫົວໜ້າໜ່ວຍງານຕ້ານ ແລະ ສະກັດກັ້ນ ຢາເສບຕິດ ເມືອງ ແລະ ຕາງໜ້າຮັບໂດຍ ເຈົ້າຂອງຊັບ.
ຄະດີດັ່ງກ່າວ, ເຈົ້າໜ້າທີ່ ກໍາລັງດໍາເນີນການສືບສວນ – ສອບສວນ ຂະຫຍາຍຜົນ ເພື່ອຊອກຫາຜູ້ຮ່ວມຂະບວນການດຽວກັນ ທີ່ຍັງເອົາຕົວຫຼົບໜີ ມາດໍາເນີນຄະດີ ແລະ ເກັບກູ້ຂອງກາງທີ່ຖືກ ກຸ່ມຄົນດັ່ງກ່າວ ລັກໄປ ມາຄືນເຈົ້າຂອງເດີມ ໃຫ້ໄດ້ຄົບຕາມຈໍານວນ.
