ລ່ຽງ ການເກັບຊັບໄວ້ໃນລົດ ເພື່ອບໍ່ໃຫ້ເປັນຊ່ອງວ່າງ ທຸບແວ່ນເອົາຊັບ

ທຸກມື້ນີ້ ການເກັບຊັບໄວ້ໃນລົດ ແມ່ນບໍ່ປອດໄພ ເພາະກຸ່ມຄົນຮ້າຍ ມັກເລາະທຸບແວ່ນລົດ ເພື່ອລັກເອົາຊັບ
ປັດຈຸບັນ, ການເກັບຊັບໄວ້ໃນລົດ ມັກຈະເກີດບັນຫາຂຶ້ນ ເຊັ່ນວ່າ ຖືກຄົນຮ້າຍທຸບແວ່ນລົດ ແລ້ວລັກເອົາຊັບສິນ ທີ່ຢູ່ພາຍໃນໄປ ເຊິ່ງນັ້ນແມ່ນ ປະກົດການທີ່ເລີ່ມມີໃຫ້ເຫັນອີກແລ້ວ; ໂດຍບັນຫາດັ່ງກ່າວນີ້, ພໍ່ – ແມ່ປະຊາຊົນ ກໍຄື ເຈົ້າຂອງຊັບ ຄວນໄດ້ເພີ່ມສະຕິໃນການຮັກສາຊັບສິນ ໃຫ້ດີຂຶ້ນກວ່າເກົ່າ, ບໍ່ຄວນເກັບມ້ຽນຊັບສິນເງິນ – ຄໍາ ໄວ້ໃນລົດ ເພື່ອບໍ່ໃຫ້ເປັນຊ່ອງວ່າງແກ່ ກຸ່ມຄົນບໍ່ດີ ສວຍໃຊ້ກໍ່ເຫດ ທຸບແວ່ນເອົາຊັບ.
ເຊິ່ງໃນໄລຍະຜ່ານມາ, ເຫດການທີ່ຊັບສິນເສຍໄປ ຢູ່ໃນລົດໃຫຍ່ ສ່ວນຫຼາຍແມ່ນຖືກລັກເອົາຈາກກຸ່ມຄົນທີ່ເປັນມືອາຊີບ ແລະ ມືສະໝັກຫຼິ້ນ ດ້ວຍຫຼາຍວິທີ ເປັນຕົ້ນແມ່ນ: ໃຊ້ເຄື່ອງມືທີ່ທັນສະໄໝ ແລະ ທຸບແວ່ນລົດ ເຂົ້າໄປລັກເອົາຊັບສິນທີ່ປະໄວ້ໃນລົດ.

ຄະດີລັກຊັບພົນລະເມືອງ ແມ່ນປະກົດການຫຍໍ້ທໍ້ອີກຢ່າງໜຶ່ງ ທີ່ສ້າງຄວາມເສຍຫາຍຫຼາຍກວ່າໝູ່ ໃນຈໍານວນຄະດີຕ່າງໆທີ່ເກີດຂຶ້ນ ຢູ່ໃນສັງຄົມ.
ວິທີການລັກ, ງັດແງະຂອງພວກເຂົາ ກໍມີຫຼາຍວິທີທີ່ແຕກຕ່າງກັນ, ບາງຄົນກໍໃຊ້ເຄື່ອງທີ່ທັນສະໄໝເຂົ້າໃນການລັກ ໂດຍສະເພາະແມ່ນ:
ປະດິດລີໂໝດຕັດສັນຍານ ລະບົບລ໋ອກກະແຈລົດໃຫຍ່, ບາງຄົນ ກໍໃຊ້ອຸປະກອນຕ່າງໆ ທຸບແວ່ນລົດໃຫຍ່ ເພື່ອເຂົ້າໄປລັກເອົາຊັບສິນຕ່າງໆຢູ່ພາຍໃນລົດ; ນອກນີ້, ບາງພວກ ກໍໃຊ້ວິທີເອົາເຫດການຕ່າງໆ ເຮັດແນວອື່ນເປັນການລົງມື, ບາງກຸ່ມ ກໍໃຊ້ວິທີການລັກແບບເຊິ່ງໜ້າ ເຊັ່ນ: ດຶງກະເປົາ, ດຶງສາຍຄໍ ແລະອື່ນໆ ຂໍພຽງແຕ່ມີໂອກາດ; ສະນັ້ນ, ຈຶ່ງເວົ້າໄດ້ວ່າ: ເຫດການຂີ້ລັກ, ງັດແງະ ມັນເກີດຂຶ້ນໄດ້ທຸກເມື່ອ ຖ້າເຮົາຫາກເຜີຕົວ ແລະ ເມີນເສີຍຕໍ່ຊັບສິນ.
ຫຼາຍທ່ານ ອາດຈະເຄີຍເຫັນແລ້ວ ວ່າ:
ຢູ່ນະຄອນຫຼວງວຽງຈັນ ໂດຍສະເພາະ ຢູ່ຕາມຮ້ານອາຫານ ຫຼື ຮ້ານກິນດື່ມ ທີ່ຜູ້ຄົນມັກຈອດປະໄວ້ແຄມທາງ ແລ້ວເຂົ້າໄປໃຊ້ບໍລິການຢູ່ສະຖານທີ່ຕ່າງໆ ແລ້ວປະຊັບສິນມີຄ່າໄວ້ໃນລົດ ສ່ວນຫຼາຍຈະມັກຖືກ ກຸ່ມຄົນຂີ່ລັກ ທຸບແວ່ນລົດ ຫຼື ໃຊ້ອຸປະກອນຕ່າງໆ ເພື່ອເປີດປະຕູລົດ ເຂົ້າໄປລັກເອົາຊັບສິນ; ເຊິ່ງໄລຍະຜ່ານມາ ເຫດການທີ່ເກີດຂຶ້ນ ປະກອບມີ:
· ໃນເວລາ 20:30 ໂມງ ຂອງວັນທີ 14 ກໍລະກົດ 2019, ເກີດເຫດ ຄົນຮ້າຍ ທຸບແວ່ນ ລົດກະບະລີໂວ້ ສີຂາວ ຢູ່ເຂດບ້ານໂພນສີນວນ ເມືອງສີສັດຕະນາກ ຜົນເສຍຫາຍເປັນເງິນ 4.000 ໂດລາສະຫະລັດ;

· ວັນທີ 24 ກໍລະກົດ 2019, ເກີດເຫດ ຄົນຮ້າຍ ທຸບແວ່ນ ລົດວີໂກ້ ສີປອນ ແລະ ລົດຣີໂວ້ ສີຂາວ ພ້ອມກັນ ຢູ່ເຂດໂຮງໝໍ 150 ຕຽງ ເມືອງຈັນທະບູ ມີເຄື່ອງເສຍຫາຍຈໍານວນໜຶ່ງ;

· ເວລາ 20:50 ໂມງ ຂອງວັນທີ 30 ກໍລະກົດ 2019, ຄົນຮ້າຍ ທຸບແວ່ນ ລົດປຣາໂດ້ ສີດໍາ ຢູ່ເຂດບ້ານທາດຂາວ, ເມືອງສີສັດຕະນາກ ຜົນເສຍຫາຍເປັນເງິນສົດ 2.000 ບາດ ແລະ ໂທລະສັບມືຖື 2 ໜ່ວຍ;

· ວັນທີ 31 ກໍລະກົດ 2019, ເກີດເຫດ ຄົນຮ້າຍ ທຸບແວ່ນ ລົດແລນກຸດເຊີ ສີຂາວ ຢູ່ເຂດບ້ານໂພນສະຫວັນໃຕ້, ເມືອງສີສັດຕະນາກ ຜົນເສຍຫາຍມີ ບູທູດ 2 ເຄື່ອງ.
ນອກຈາກນີ້, ຍັງມີຫຼາຍເຫດການທີ່ເກີດຂຶ້ນ ຢູ່ຕາມບ້ານຕ່າງໆ ພາຍໃນ 9 ຕົວເມືອງ ໃນນະຄອນຫຼວງວຽງຈັນ ທີ່ບໍ່ສາມາດຢິບຍົກມາໃຫ້ຮູ້ໄດ້.
ນອກຈາກ ຢູ່ນະຄອນຫຼວງວຽງຈັນແລ້ວ, ຢູ່ບັນດາແຂວງຕ່າງໆ ກໍເກີດຂຶ້ນ ເຊັ່ນດຽວກັນ ເປັນຕົ້ນແມ່ນ:

· ເຈົ້າໜ້າທີ່ ປກສ ແຂວງຄຳມ່ວນ ໄດ້ຕິດຕາມຈັບຕົວ ທ້າວ ລູບີ້ ອາຍຸ 33 ປີ ຢູ່ບ້ານເຄື່ອນຊ້າງ, ເມືອງທ່າແຂກ, ແຂວງຄຳມ່ວນ ໄດ້ ໃນວັນທີ 15 ເມສາ 2017 ໃນຂໍ້ຫາທຸບແວ່ນລົດ ແລະ ລັກເອົາຊັບສິນທີ່ມີຄ່າໄປ.

ທ້າວ ລູບີ້ ຮັບສາລະພາບ ວ່າ:

ໄດ້ເຄື່ອນໄຫວທຸບແວ່ນລົດຫຼາຍຄັນ ແລະ ລັກເອົາຊັບສິນຂອງພົນລະເມືອງ 10 ຄັ້ງ ໃນເຂດເທດສະບານເມືອງທ່ານແຂກ, ແຂວງຄຳມ່ວນ, ລວມມູນຄ່າເສຍຫາຍມີ ເງິນກີບ 5.300.000 ກີບ, ເງິນບາດ 34.000 ບາດ, ເງິນໂດລາສະຫະລັດ 102 ໂດລາ, ແຫວນຄຳ 3 ວົງ, ໂທສະສັບ 5 ເຄື່ອງ, ໂນດບຸກ 3 ເຄື່ອງ ແລະ ເອກະສານຈຳນວນໜຶ່ງ.
ຕໍ່ກັບ ການທຸບແວ່ນລົດ ເອົາວັດຖຸສິງຂອງຕ່າງໆຂອງ ກຸ່ມຄົນຂີ້ລັກ, ສ່ວນຫຼາຍ ພວກເຂົາຈະແນໃສ່ເປົ້າໝາຍລົດທີ່ມີລາຄາແພງ, ລົດຫຼູ ຫຼື ລົດຂອງຄົນທີ່ມີຖານະເງິນ, ຄໍາ, ບາງຄັ້ງ ລົດທີ່ບໍ່ຫຼູ ແຕ່ມີສິ່ງຂອງທີ່ພວກເຂົາຕ້ອງການ ກໍຈະທຸບແວ່ນເອົາເລີຍ ແລະ ທີ່ສຳຄັນ ພວກກໍ່ເຫດແມ່ນມີຄວາມຊຳນານ ໃນການເອົາຕົວຫຼົບໜີ ຫຼັງຈາກກໍ່ເຫດ; ສະພາບການດັ່ງກ່າວ, ໄດ້ສ້າງຄວາມກົດດັນ ແລະ ເລັ່ງທວງໃຫ້ກັບ ເຈົ້າໜ້າທີ່ວິຊາສະເພາະ ຕ້ອງເພີ່ມທະວີ ໃນການຊອກຈັບຕົວ ກຸ່ມຄົນດັ່ງກ່າວນີ້ ມາດໍາເນີນຄະດີ ໃຫ້ໄດ້.
ຜ່ານການດໍາເນີນຄະດີຂອງ ເຈົ້າໜ້າທີ່ ໃນຫຼາຍຄັ້ງ ຜ່ານມາ, ພວກເຮົາ ພໍສະຫຼຸບໄດ້ ວ່າ:
ການລັກ ແມ່ນເກີດຈາກ ຄວາມໂລບມາກຂອງບຸກຄົນ, ເກີດຈາກ ການດໍາລົງຊີວິດ ໃນຄອບຄົວ, ເກີດຈາກ ແນວຄິດຂີ້ຄ້ານ ອອກແຮງງານ, ເກີດຈາກ ການດໍາລົງຊີວິດ ຫຼິ້ນກິນຟຸມເຟືອຍ ແລະອື່ນໆ.

ສະນັ້ນ, ເພື່ອຮັກສາຊັບສິນຂອງຕົນເອງ ບໍ່ໃຫ້ສູນຫາຍ ແລະ ເສຍໄປຫຼ້າໆ ໃຫ້ກັບ ພວກກຸ່ມຄົນຂີ້ລັກ, ບັນດາທ່ານ ຄວນມີສະຕິຕໍ່ ການເກັບມ້ຽນຊັບສິນຂອງທ່ານ ໃຫ້ດີ, ບໍ່ຄວນປະເງິນ ຫຼື ກະເປົາເງິນ, ໂທລະສັບມືຖື, ຄອມພິວເຕີໂນດບຸກ ແລະອື່ນໆ ໄວ້ໃນລົດ ຢ່າງເດັດຂາດ, ເພາະສິ່ງຂອງເຫຼົ້ານັ້ນ ຈະເປັນສິ່ງຢົ້ວຕາຢົ້ວໃຈໃຫ້ ກຸ່ມຄົນຂີ່ລັກ ທີ່ຫວັງຈະຈອບລັກເອົາຊັບສິນຂອງທ່ານ ແລະ ຖ້າວ່າ ບັນດາທ່ານ ບໍ່ປະສິ່ງຢົ້ວໃຈໄວ້ໃນລົດ ເຊື່ອວ່າ ບັນຫາດັ່ງກ່າວນີ້ 

( ບັນຫາ ທຸບແວ່ນເອົາຊັບ ) ກໍຈະຫຼຸດໜ້ອຍຖອຍລົງ.