ຍັກຍອກຊັບ 22 ລ້ານກວ່າກີບ ຮັບໂທດ 2 ປີ ພ້ອມໃຊ້ໜີທາງແພ່ງ

ການຍັກຍອກຊັບຄົນອື່ນ ຖືເປັນຄວາມຜິດທາງອາຍາ, ຜູ້ກະທຳ ຕ້ອງຮັບໂທດ ແລະ ໃຊ້ຄືນໜີ້ທາງແພ່ງ
ນາງ ພອນທິບ ອາຍຸ 25 ປີ ຢູ່ບ້ານສີໄຄທົ່ງ ເມືອງສີໂຄດຕະບອງ ນະຄອນຫຼວງວຽງຈັນ ເປັນຈຳເລີຍ ໃນສະຖານ ຍັກຍອກຊັບພົນລະເມືອງ ມູນຄ່າເສຍຫາຍ 22 ລ້ານກວ່າກີບ ແລະ ຖືກ ອົງການໄອຍະການ ປະຊາຊົນ ສັ່ງຟ້ອງຕໍ່ ສານອາຍາ ໃນວັນທີ 8 ສິງຫາ 2019 ເພື່ອໃຫ້ສານພິຈາລະນາຕັດສິນ ຕາມກົດໝາຍ; ດັ່ງນັ້ນ, ສານ ໄດ້ເຫັນດີລົງໂທດ ຕັດອິດສະຫຼະພາບ 2 ປີ ປັບໃໝ 500.000 ກີບ ແຕ່ໃຫ້ປະຕິບັດໂທດຕົວຈິງ 1 ປີ ພ້ອມໃຊ້ແທນໜີ້ສິນທີ່ຍັກຍອກມາໃຫ້ຄົບ.

ນາງ ພອນທິບ ອາຍຸ 25 ປີ ຢູ່ບ້ານສີໄຄທົ່ງ ເມືອງສີໂຄດຕະບອງ ນະຄອນຫຼວງວຽງຈັນ ເປັນຈຳເລີຍ ໃນສະຖານ ຍັກຍອກຊັບພົນລະເມືອງ

ຈຳເລີຍ ໄດ້ຜ່ານການດຳເນີນຄະດີ ມາແຕ່ວັນທີ 28 ມັງກອນ 2019 ຮອດວັນທີ 8 ສິງຫາ 2019 ເປັນເວລາ 6 ເດືອນກວ່າ; ຈາກນັ້ນ, ຈຶ່ງຖືກ ອົງການໄອຍະການ ປະຊາຊົນ ນະຄອນຫຼວງວຽງຈັນ ນຳເອົາສໍານວນຄະດີຂອງ ຈຳເລີຍ ເລກທີ 481/ອຍກ.ນວ ຂຶ້ນມາສັ່ງຟ້ອງຕໍ່ ຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ.
ຜ່ານການຄົ້ນຄວ້າໄຈ້ແຍກ ການກະທຳຜິດ ( ການຍັກຍອກຊັບຄົນອື່ນ ) ຢ່າງລະອຽດ, ຄົບຖ້ວນ , ຮອບດ້ານ ແລະ ພາວະວິໄສແລ້ວ ເຫັນວ່າ:
ໂຈດທາງແພ່ງ ຊື່ ນາງ ເດືອນໂສພາ ອາຍຸ 43 ປີ ຢູ່ບ້ານໂພນໄຊ ເມືອງໄຊເສດຖາ ນະຄອນຫຼວງວຽງຈັນ ໄດ້ເຂົ້າແຈ້ງຄວາມກັບ ເຈົ້າໜ້າທີ່ກ່ຽວຂ້ອງວ່າ: ຈຳເລີຍ ໄດ້ຍັກຍອກຊັບ ມູນຄ່າ 22.688.000 ກີບ; ເມື່ອມີການແຈ້ງຄວາມຄືແນວນັ້ນ, ເຈົ້າໜ້າທີ່ ຈຶ່ງໄດ້ນຳຕົວຈຳເລີຍມາສອບສວນ, ໂດຍມີເນື້ອຄະດີ ດັ່ງນີ້: ໃນວັນທີ 2 ພຶດສະພາ 2017, ຈຳເລີຍ ໄດ້ເຂົ້າເຮັດວຽກ ຢູ່ຮ້ານຄອມພິວເຕີຂອງ ໂຈດທາງແພ່ງ ຕັ້ງຢູ່ເຂດບ້ານໂພນໄຊ ເມືອງໄຊເສດຖາ.
ເຊິ່ງແມ່ນ ຮ້ານບໍລິການຂາຍຄອມພິວເຕີ ແລະ ອາໄຫຼ່ຄອມພິວເຕີ ໂດຍ ຈຳເລີຍ ໄດ້ຮັບເງິນ ເດືອນລະ 1.000.000 ກີບ, ສ່ວນໜ້າທີ່ຮັບຜິດຊອບ ແມ່ນເປັນຜູ້ຂຽນບິນຮັບເງິນນໍາລູກຄ້າ, ຮັບຜິດຊອບຂາຍເຄື່ອງໜ້າຮ້ານ ແລະ ລາຍຈ່າຍທັງໝົດ ພາຍໃນຮ້ານ; ພ້ອມນັ້ນ, ຕອນແລງຂອງທຸກໆມື້ ແມ່ນຕ້ອງໄດ້ສະຫຼຸບບັນຊີ ທີ່ໄດ້ຈາກການຂາຍເຄື່ອງ ມອບໃຫ້ແກ່ ໂຈດທາງແພ່ງ.

· ມາໃນເດືອນກັນຍາ 2017, ໂຈດທາງແພ່ງ ໄດ້ເປີດ ສະຖາບັນການເງິນ ຈຸລະພາກ ແລະ ບໍ່ໄດ້ຢູ່ຮ້ານເປັນປົກກະຕິ ຈຶ່ງມອບວຽກທຸກຢ່າງໃນຮ້ານຄອມພິວເຕີ ໃຫ້ ຈຳເລີຍ ຮັບຜິດຊອບຜູ້ດຽວ ແລະ 2 – 3 ມື້ ໂຈດທາງແພ່ງ ຈຶ່ງຈະເຂົ້າມາຮ້ານເທື່ອໜຶ່ງ ເພື່ອກວດກາບັນຊີ ແລະ ເງິນ.

· ເມື່ອ ຈຳເລີຍ ໄດ້ມີໂອກາດ ຈຶ່ງຊອກຫາວິທີຍັກຍອກເອົາເງິນທີ່ໄດ້ຈາກ ການຂາຍເຄື່ອງຄອມພິວເຕີ້ ດ້ວຍຮູບການເພີ່ມຈຳນວນເງິນຈາກຕົວຈິງ ໃສ່ບິນລາຍຈ່າຍ ໃນແຕ່ລະມື້ ແລະ ບາງຄັ້ງ ກໍໄປຊື້ເຄື່ອງຢູ່ຮ້ານອື່ນມາໃຫ້ ລູກຄ້າ ແລ້ວຂຽນບິນໃນລາຄາເຄື່ອງ ສູງກວ່າລາຄາຊື້ຕົວຈິງ, ເມື່ອຮອດເວລາຄິດໄລ່ບິນ ຈຳເລີຍ ກໍບໍ່ເອົາບິນມາຄິດໄລ່ໝົດ ເພື່ອເຮັດໃຫ້ ຜົນບວກເງິນອອກມາ ໜ້ອຍກວ່າ ເງິນທີ່ໄດ້ຮັບຕົວຈິງ ແລະ ກໍເຮັດແບບນີ້ມາແລ້ວຫຼາຍຄັ້ງ.

· ເມື່ອ ໂຈດທາງແພ່ງ ມີຄວາມສົງໄສ ຈຶ່ງກວດເບິ່ງບັນຊີຍ້ອນຫຼັງ ທັງລາຍຮັບ ແລະ ລາຍຈ່າຍ ພາຍໃນຮ້ານ, ແລ້ວຮູ້ວ່າ: ຈຳເລີຍ ໄດ້ຍັກຍອກເງິນໄປທັງໝົດ ຈໍານວນ 22.688.000 ກີບ; ສະນັ້ນ, ຈຶ່ງໄປແຈ້ງຕໍ່ ເຈົ້າໜ້າທີ່ ປກສ ເມືອງໄຊເສດຖາ ແລະ ສາມາດກັກຕົວໄດ້ ໃນວັນທີ 28 ມັງກອນ 2019.

ຜ່ານການຄົ້ນຄວ້າຂອງ ຄະນະສານອາຍາ ເຫັນວ່າ:

ມີຫຼັກຖານ ຮັດກຸມ, ໜັກແໜ້ນ ແລະ ພຽງພໍ ທີ່ຈະຢັ້ງຢືນວ່າ: ການກະທໍາຂອງ ຈຳເລີຍ ເປັນການກະທໍາຜິດທາງອາຍາ ໃນສະຖານ ຍັກຍອກຊັບພົນລະເມືອງ ທີ່ແຕະຕ້ອງເຖິງກໍາມະສິດສ່ວນຕົວ, ຕາມທີ່ກໍານົດໄວ້ ໃນກົດໝາຍອາຍາ ມາດຕາ 121, ເຊິ່ງການກະທໍາທັງໝົດນີ້ ຈໍາເລີຍ ກໍໃຫ້ການຮັບສາລະພາບແລ້ວ.

ທັ້ງນີ້, ການກະທຳຜິດຂອງ ຈຳເລີຍ ເປັນການກະທໍາຜິດ ໂດຍເຈດຕະນາ ເນື່ອງຈາກວ່າ ຈໍາເລີຍ ໄດ້ໃຊ້ຄວາມໄວ້ເນື້ອເຊື່ອໃຈ ແລະ ໜ້າທີ່ວຽກງານ ເອົາເງິນຂອງ ໂຈດທາງແພ່ງ ໄປໃຊ້ຈ່າຍສ່ວນຕົວ ດ້ວຍຮູບການທີ່ກ່າວມາຂ້າງເທິງນັ້ນ ແລະ ກະທຳມາຈໍານວນຫຼາຍຄັ້ງ, ໂດຍທີ່ ຈໍາເລີຍ ກໍຮູ້ດີວ່າ: ການກະທໍາດັ່ງກ່າວ ເປັນການກະທໍາຜິດຕໍ່ກົດໝາຍ ແຕ່ ຈໍາເລີຍ ຍັງກະທໍາລົງໄປ.

ສະນັ້ນ, ສານ ຈຶ່ງເຫັນຄວນຕັດສິນ ຕັດອິດສະຫຼະພາບ 2 ປີ ປັບໃໝ 500.000 ກີບ, ແຕ່ ສານ ໃຫ້ປະຕິບັດໂທດຕົວຈິງ 1 ປີ; ສ່ວນ ຜົນເສຍຫາຍທີ່ເກີດຂຶ້ນ, ໂຈດທາງແພ່ງ ໄດ້ຮຽກຮ້ອງໃຫ້ ຈໍາເລີຍ ທົດແທນເງິນຄືນ ຈໍານວນ 22.688.000 ກີບ; ສະນັ້ນ, ຄະນະສານ ຈຶ່ງເຫັນວ່າ: ມີເຫດຜົນ ແລະ ໃຫ້ ຈໍາເລີຍ ຮັບຜິດຊອບໃຊ້ແທນຄືນໃຫ້ແກ່ ໂຈດທາງແພ່ງ ໃຫ້ຄົບຕາມຈຳນວນ, ໂດຍອີງຕາມທີ່ໄດ້ລະບຸໄວ້ ໃນກົດໝາຍ ວ່າດ້ວຍ ຂໍ້ຜູກພັນ ໃນສັນຍາ ແລະ ນອກສັນຍາ ມາດຕາ 83, ກົດໝາຍອາຍາ ມາດຕາ 121 ວັກ 2 ແລະ ກົດໝາຍ ວ່າດ້ວຍ ການດໍາເນີນຄະດີອາຍາ ສະບັບປັບປຸງ ປີ 2012 ມາດຕາ 152 ຂໍ້ 5.