ໃນວັນທີ 16 ກໍລະກົດ 2019, ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ຕິດຕາມຈັບຕົວຄົນຮ້າຍທີ່ລັກລົດກະບະຣີໂວ້ ຢູ່ເຂດບ້ານໜອງດ້ວງເໜືອ ເມືອງສີໂຄດຕະບອງ ພ້ອມໝູ່ 1 ຄົນ ທີ່ໃຫ້ການຊຸກເຊື່ອງ ແລະ ການຊື້-ຂາຍຊັບແບບຜິດກົດໝາຍ
ຜູ້ຖືກຫາຊື່ ທ້າວ ບຸນເຫຼືອມ ຫຼື ຕົ້ນ ອາຍຸ 30 ປີ ຢູ່ບ້ານອາລັນວັດຕະນາ ເມືອງຈໍາພອນ ແຂວງສະຫວັນນະເຂດ ເປັນຜູ້ລັກລົດກະບະຄັນດັ່ງກ່າວ ແລະ ທ້າວ ອາຕີ ຫຼື ຕີ ອາຍຸ 35 ປີຢູ່ບ້ານໜອງດາ ເມືອງສີໂຄດຕະບອງ ນະຄອນຫຼວງວຽງຈັນ ໃນຂໍ້ຫາໃຫ້ການຊຸກເຊື່ອງ, ການຊື້-ຂາຍຊັບແບບຜິດກົດໝາຍ.
ເຈົ້າໜ້າທີ່ ປກສ ເມືອງສີໂຄດຕະບອງ ໃຫ້ຮູ້ວ່າ: ໃນວັນທີ 15 ກໍລະກົດ 2019, ທ້າວ ເສີນຕົງສຸຍ ອາຍຸ 39 ປີ ຢູ່ບ້ານດົງນາໂຊກໃຕ້ ເມືອງສີໂຄດຕະບອງ ໄດ້ເຂົ້າແຈ້ງຄວາມວ່າ: ມີຄົນຮ້າຍບໍ່ຮູ້ຈໍານວນມາລັກເອົາລົດກະບະຍີ່ຫໍ້ TOYOTA ລຸ້ນ REVO ສີແດງຊໍ້າ ບໍ່ມີປ້າຍທະບຽນ ໃນຂະນະທີ່ຂັບຂີ່ໄປຈອດໄວ້ຢູ່ບ້ານໜອງດ້ວງເໜືອ ເມືອງສີໂຄດຕະບອງ ແລ້ວນັ່ງຊຸມແຊວກັບໝູ່ເຂດດັ່ງກ່າວ. ຈາກນັ້ນ, ເຈົ້າໜ້າທີ່ໄດ້ແຕ່ງຕັ້ງກໍາລັງຕໍາຫຼວດວິຊາສະເພາະໄປກວດກາຢູ່ຈຸດເກີດເຫດ ພ້ອມທັງເກັບກໍາຂໍ້ມູນຢ່າງລະອຽດ ຈຶ່ງຮູ້ວ່າລົດກະບະຄັນດັ່ງກ່າວແມ່ນຈອດຢູ່ເຮືອນຫຼັງໜຶ່ງຢູ່ບ້ານໜອງດາ, ເວລາ 9:30 ໂມງ ຂອງວັນທີ 16 ກໍລະກົດ 2019 ຈຶ່ງເຂົ້າກວດກາ ພ້ອມທັງຈັບຕົວເຈົ້າຂອງເຮືອນຊື່ ທ້າວ ອາຕີ ແລະ ທ້າວ ບຸນເຫຼືອມ ຫຼື ຕົ້ນ ພ້ອມຂອງກາງລົດຄັນດັ່ງກ່າວໄປສອບສວນ.
ທ້າວ ບຸນເຫຼືອມ ຫຼື ຕົ້ນ ສາລະພາບວ່າ: ໄດ້ທຽວໄປ-ມາລະຫວ່າງ ແຂວງສະຫວັນນະເຂດ ຫານະຄອນຫຼວງວຽງຈັນ ແລະ ໄດ້ຮູ້ຈັກຮັກແພງກັບ ທ້າວ ອາຕີ ແບບສະໜິດສະໜົມ. ມື້ກໍ່ເຫດເວລາປະມານ 5:00 ໂມງ ຂອງວັນທີ 15 ກໍລະກົດ 2019,ໄດ້ຍ່າງອອກມາຈາກເຮືອນພັກແຫ່ງໜຶ່ງເຂດບ້ານໜອງດ້ວງເໜືອ ໄປບ້ານດົງນາໂຊກ ປະມານ 200 ແມັດ.
ໃນລະຫວ່າງນັ້ນ, ໄດ້ພົບເຫັນລົດກະບະຄັນດັ່ງກ່າວຈອດຢູ່ແຄມທາງສະພາບລົດບໍ່ອັດປະຕູລົດແຕ່ໃນລົດບໍ່ມີຄົນຢູ່ ແລະ ເຫັນກະແຈປະໄວ້ໃນລົດ ຈຶ່ງສວຍໂອກາດລັກເອົາແລ້ວຂັບຂີ່ໄປຫາ ທ້າວ ອາຕີ ເພື່ອຊອກບ່ອນຂາຍໃນລາຄາ 300.000 ບາດ ແຕ່ບໍ່ມີໃຜຊື້ມາວັນທີ 16 ກໍລະກົດ 2019 ໄດ້ເອົາລົດຄັນດັ່ງກ່າວມາຈອດໄວ້ຢູ່ເຮືອນ ທ້າວ ອາຕີ ທີ່ບ້ານໜອງດາ ເພື່ອລໍຖ້າຄົນມາຊື້ ຈຶ່ງຖືກເຈົ້າໜ້າທີ່ກັກຕົວພ້ອມກັບລົດຄັນດັ່ງກ່າວໄປດໍາເນີນຄະດີຕາມກົດໝາຍ. ສ່ວນລົດກະບະຄັນດັ່ງກ່າວ, ເຈົ້າໜ້າທີ່ ປກສ ເມືອງສີໂຄດຕະບອງ ໄດ້ມອບຄືນໃຫ້ແກ່ເຈົ້າຂອງເດີມເປັນທີ່ຮຽບຮ້ອຍແລ້ວ.
ທີ່ມາ: ຫນັງສືພິມຄວາມສະຫງົບ
