ໃນ 5 ປີຜ່ານມາ (2015-2019) ທົ່ວບ້ານໂພນຕ້ອງ ເມືອງໄຊທານີ ນະຄອນຫຼວງວຽງຈັນ ມີ ປະກົດການຫຍໍ້ທໍ້ເກີດຂຶ້ນ ທັງໝົດ 20 ເລື່ອງ; ໃນນີ້, ພົ້ນເດັ່ນກວ່າໝູ່ແມ່ນອຸບັດຕິເຫດເກີດຂຶ້ນ 12 ຄັ້ງ; ຈາກປະກົດການຫຍໍ້ທໍ້ທີ່ເກີດຂຶ້ນນັ້ນສາມາດແກ້ໄຂຂັ້ນບ້ານໄດ້ທັງໝົດ 16 ເລື່ອງ.
ທ່ານ ນາງ ສີພັນ ຈັນດາລາ ນາຍບ້ານໆໂພນຕ້ອງ ກ່າວໃນກອງປະຊຸມສະຫຼຸບການເຄື່ອນໄຫວວຽກງານຮອບດ້ານ 5 ປີຂອງບ້ານ ໂພນຕ້ອງ ວ່າ: ໃນໄລຍະ 5 ປີ ຜ່ານມາ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພໍ່-ແມ່ປະຊາຊົນດ້ວຍຫຼາຍຮູບການ ເປັນ ຕົ້ນແມ່ນໄດ້ນຳເອົາບັນດາແນວທາງນະໂຍບາຍຂອງພັກ, ມະຕິ, ຄຳສັ່ງ, ລະບຽບກົດໝາຍຂອງລັດ ແລະ ເອກະສານມູນເຊື້ອວັນສຳຄັນຕ່າງໆຂອງພັກຂອງຊາດລົງ ເຜີຍແຜ່ ເພື່ອເຮັ ດໃຫ້ພໍ່-ແມ່ປະຊາ ຊົນຮັບຮູ້-ເຂົ້າໃຈຕໍ່ແນວທາງນະ ໂຍບາຍຂອງພັກ-ລັດ, ເອົາໃຈໃສ່ສຶກສາອົບຮົມແນວຄິດໃຫ້ກຳລັງ ປກສ ບ້ານ ແລະ ສົມທົບກັບ ປກສ ກຸ່ມ ເຄື່ອນໄຫວວຽກງານວິຊາສະເພາະປ້ອງກັນເວນຍາມປະຈຳການປ້ອງກັນພາຍໃນບ້ານຕະຫຼອດ 24 ຊົ່ວໂມງ; ໄລຍະຜ່ານມາ ທົ່ວບ້ານມີປະກົດການຫຍໍ້ທໍ້ເກີດຂຶ້ນ ທັງໝົດ 20 ເລື່ອງ; ໃນນີ້, ອຸບັດຕິເຫດ 12 ຄັ້ງ, ຜົວເມຍຜິດຖຽງກັນ 2 ເລື່ອງ, ເສບ ແລະ ຄ້າຢາເສບຕິດ 2 ເລື່ອງ ກັກຕົວໄດ້ 2 ຄົນ ແລະ ຄາດຕະກໍາ 1 ເລື່ອງ; ຈາກປະກົດການຫຍໍ້ທໍ້ທີ່ເກີດຂຶ້ນ ສາມາດແກ້ໄຂຂັ້ນບ້ານໄດ້ 16 ເລື່ອງ, ສົ່ງໃຫ້ເມືອງແກ້ໄຂ 3 ເລື່ອງ.
ນອກຈາກນີ້, ພາຍໃນບ້ານຍັງໄດ້ເຮັດໜ້າທີ່ໃນການຂຶ້ນບັນຊີເປົ້າໝາຍເຄື່ອນໄຫວບໍ່ດີຢູ່ພາຍໃນບ້ານ ທັງໝົດ 12 ຄົນ; ໃນນັ້ນ, ເປົ້າໝາຍປະເພດ 1 ມີ 6 ຄົນ, ປະເພດ 2 ມີ 2 ຄົນ ແລະ ປະເພດ 3 ມີ 4 ຄົນ; ຈາກການເກັບກໍາເປົ້າໝາຍອົງການປົກຄອງບ້ານໄດ້ສົມທົບກັບພາກສ່ວນກ່ຽວຂ້ອງລົງສຶກສາອົບຮົມເປົ້າໝາຍປະເພດ 1 ແລະ 2 ໄດ້ທັງໝົດ 8 ຄົນ, ສ່ວນເປົ້າ ໝາຍປະເພດ 3 ແມ່ນສາມາດກັກ ຕົວດໍາເນີນຄະດີໄດ້ ທັງໝົດ 4 ຄົນ.
ກອງປະຊຸມຍັງໄດ້ປ່ອນບັດຄັດເລືອກເອົານາຍບ້ານຜູ້ໃໝ່
ກອງປະຊຸມດັ່ງກ່າວຈັດຂຶ້ນ ໃນວັນທີ 18 ກໍລະກົດ 2019, ໂດຍການເຂົ້າຮ່ວມຂອງ ທ່ານ ຄຳປ່ຽນ ອິນທະລືຊາ ຮອງເຈົ້າເມືອງໆໄຊທານີ, ມີແຂກຮັບເຊີນ, ອຳນາດການປົກຄອງບ້ານ, ອົງການຈັດ ຕັ້ງມະຫາຊົນ, ພໍ່-ແມ່ປະຊາຊົນ ພາຍໃນບ້ານ ເຂົ້າຮ່ວມ; ໃນກອງປະຊຸມຍັງໄດ້ປ່ອນບັດຄັດເລືອກເອົານາຍບ້ານຜູ້ໃໝ່ ຈາກຜູ້ລົງສະໝັກເລືອກຕັ້ງ 4 ທ່ານ ເລືອກເອົາ 1 ທ່ານ; ຜ່ານການປ່ອນບັດເລືອກໄດ້ທ່ານ ນາງ ສີພັນ ຈັນດາລາ ເປັນນາຍບ້ານໆໂພນຕ້ອງ ເພີ່ມອີກ 1 ສະໄໝ.
ທີ່ມາ: ຫນັງສືພິມຄວາມສະຫງົບ
