ພາສີປະຈໍາແຂວງເຊກອງປະຕິບັດໄດ້ພຽງ 1,7 ຕື້ກວ່າກີບຂອງ 5 ເດືອນຕົ້ນປີ ຕ້ອງສູ້ຊົນໃຫ້ໄດ້ 8 ຕື້ກີບ ໃນປີ 2019

ອັດຕະປື: ຜ່ານໄປ 5 ເດືອນ ການຈັດເກັບລາຍຮັບເຂົ້າງົບປະມານແຫ່ງລັດຂອງກອງກວດກາ ພາສີປະຈໍາແຂວງເຊກອງປະຕິບັດໄດ້ພຽງ 1,7 ຕື້ກວ່າກີບ, ຂະນະທີ່ຕົວເລກໝົດປີສູງເຖິງ 8 ຕື້ກີບ, ດ້ານຫົວໜ້າກອງລະບຸ ຍັງອີກ 7 ເດືອນທ້າຍປີ ຕ້ອງເຮັດວຽກໜັກຂຶ້ນ ເພື່ອສູ້ຊົນເກັບລາຍຮັບໃຫ້ບັນລຸຕາມແຜນການທີ່ວາງໄວ້.

href="https://blogger.googleusercontent.com/img/b/R29vZ2xl/AVvXsEimfxvNeEG6M8PqU4D3ekebIbVXG3GtvRQtq3j9Cg_OHWcftzB32iALOsjmTsyShQ8R3nwVLMU5wnTmFKZEWJjCWCr3iGyku_Y9jXr7jCPPKdCAj5sU4SJw6Y1L6C2Pt2VknYrj2gsvpDI/s1600/IMG_ORG_1560394024049.png" imageanchor="1">

ທ່ານ ຄໍາສຸກ ສາລີວັນນະລາ ຄະນະກອງຄຸ້ມຄອງພາສີ VII, ຫົວໜ້າກອງກວດກາພາສີປະຈໍາແຂວງເຊກອງໃຫ້ຮູ້ວ່າ: ການຈັດຕັ້ງປະຕິບັດໜ້າທີ່ວຽກງານວິຊາສະເພາະ ໂດຍສະເພາະແມ່ນການເກັບລາຍຮັບເຂົ້າງົບປະມານຂອງກອງກວດກາພາສີປະຈໍາແຂວງເຊກອງໃນໄລຍະຜ່ານມາ ແມ່ນໄດ້ນໍາເອົາທາງນະໂຍບາຍຂອງພັກ-ລັດ, ຂໍ້ກໍານົດກົດໝາຍເປັນບ່ອນອີງ ແລະໄດ້ສຶກສາອົບຮົມທາງດ້ານແນວຄິດການເມືອງໃຫ້ພະນັກງານທຸກຄົນເອົາໃຈໃສ່ເຮັດໜ້າທີ່ຕາມພາລະບົດບາດ ເພື່ອຕ້ານ ແລະສະກັດກັ້ນການຄ້າ-ຂາຍເຖື່ອນ, ການລັກລອບສິນຄ້າໜີພາສີພາຍໃນດ່ານ ແລະນອກດ່ານ, ຄຸ້ມຄອງກວດກາສິນຄ້າປາຍທາງເຊັ່ນ: ສິນຄ້ານໍາເຂົ້າໃນຮູບແບບການລົງທຶນ ແລະສິນຄ້າອື່ນໆ.

 ສໍາລັບການເກັບລາຍຮັບເຂົ້າງົບປະມານໃນປີ 2019 ກອງກວດກາພາສີປະຈໍາແຂວງເຊກອງໄດ້ຮັບຕົວເລກທັງໝົດ 8 ຕື້ກີບທຽບໃສ່ປີ 2018 ເພີ່ມຂຶ້ນເກືອບ 1 ເທົ່າຕົວ ໂດຍຜ່ານການປະຕິບັດໃນ 5 ເດືອນຜ່ານມາ ບັນລຸໄດ້ພຽງແຕ່ 1,75 ຕື້ກວ່າກີບທຽບໃສ່ແຜນປີເທົ່າກັບ 21,98% ໃນນີ້ກອງກວດກາພາສີປະຈໍາແຂວງປະຕິບັດໄດ້ 1,56 ຕື້ກວ່າກີບທຽບໃສ່ແຜນເທົ່າກັບ 20,61% ແລະດ່ານພາສີທ້ອງຖິ່ນດາກຕະອອກ 192 ລ້ານກວ່າກີບ ຊຶ່ງລາຍຮັບສ່ວນໃຫຍ່ໄດ້ຈາກການແກ້ໄຂລົດບໍ່ຖືກຕ້ອງ, ເຄື່ອງອຸປະໂພກ-ບໍລິໂພກ, ເຄື່ອງກໍ່ສ້າງ ແລະອື່ນໆ.

 ແນວໃດກໍຕາມ ເພື່ອຮັບປະກັນໃຫ້ແກ່ການຈັດເກັບລາຍຮັບເຂົ້າງົບປະມານບັນລຸຕາມແຜນການທີ່ວາງໄວ້, ໃນ7 ເດືອນຕໍ່ໜ້າ ກອງກວດກາພາສີປະຈໍາແຂວງເຊກອງຈະປະສານສົມທົບກັບພາກສ່ວນທີ່ກ່ຽວຂ້ອງສືບຕໍ່ແກ້ໄຂຄະດີລົດບໍ່ຖືກຕ້ອງທີ່ຍັງຄ້າງ, ຄຽງຄູ່ກັນນີ້ ກໍຕ້ອງຫັນວຽກງານພາສີເປັນທັນສະໄໝ ໂດຍການນໍາໃຊ້ເຄື່ອງມືໄອທີຕ່າງໆເຂົ້າຊ່ວຍໃນການປະຕິບັດໜ້າທີ່ວຽກງານ ທັງນີ້ ກໍເພື່ອແນໃສ່ເຮັດໃຫ້ການເກັບລາຍຮັບມີຄວາມສະດວກ, ວ່ອງໄວ, ທັນສະໄໝ, ໂປ່ງໃສ ແລະສາມາດກວດສອບໄດ້. ທ່ານ ຄໍາສຸກ ສາລີວັນນະລາ ກ່າວ.

ຂ່າວ : ສັນຍາ

_______
ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ
ສາມາດສົ່ງໄປທາງຂໍ້ຄວາມ ໄປທີ່ m.me/Pakaad

ພິເສດ: ເປັນກໍາລັງໃຈໃຫ້ທີມງານພວກເຮົາ ພຽງແຕ່ທ່ານກົດອ່ານໂຄສະນາ ທີ່ປະກົດຢູ່ດ້ານລຸ່ມ