ຫ້ອງການກະສິກຳ ແລະ ປ່າໄມ້ ເມືອງນາຊາຍທອງ ນະຄອນຫຼວງວຽງຈັນ ຮ່ວມກັບຊາວກະສິກອນຜູ້ທີ່ນຳໃຊ້ນ້ຳຊົນລະປະທານ ພ້ອມກັນສ້າງຂະບວນການອະນາໄມລວງຄອງເໝືອງ ແລະ ວັນເປີດນ້ຳຊົນລະປະທານ ໃນການຕອບສະໜອງນ້ຳໃຫ້ພໍ່ແມ່ປະຊາຊົນຮັບໃຊ້ການຜະລິດລະດູແລ້ງ ສົກປີ 2017-2018 ໂດຍອີງໃສ່ກົດໝາຍຊົນລະປະທານ ເຊິ່ງໄດ້ກຳນົດເອົາວັນທີ 3 ພະຈິກຂອງທຸກໆປີ ເປັນວັນຊົນລະປະທານແຫ່ງຊາດ ແລະ ເປັນການກວດກາຄວາມພ້ອມ ເພື່ອຕອບສະໜອງນ້ຳໃຫ້ປະຊາຊົນທຳການຜະລິດລະດູແລ້ງທົ່ວເມືອງ.
ທ່ານ ຄຳໄພ ພົມມະຈັນ ຫົວໜ້າຫ້ອງການກະສິກຳ ແລະ ປ່າໄມ້ ເມືອງນາຊາຍທອງ ໄດ້ກ່າວວ່າ: ແຜນການຜະລິດລະດູແລ້ງປີ 2017-2018 ທົ່ວເມືອງມີເນື້ອທີ່ນາແຊງທັງໝົດ 4.330 ເຮັກຕາ ໃນນີ້ ສາມາດຂຶ້ນແຜນອະນາໄມລວງຄອງເໝືອງໄດ້ທັງໝົດ 105 ກິໂລແມັດ ໃນຈຳນວນ 6 ໂຄງການ ເຊັ່ນ: ອ່າງນ້ຳຊ່ວງ ອ່າງນ້ຳຫຸມ ອ່າງຫ້ວຍຊອນ-ຫ້ວຍຊົ້ວ ໜອງຕະເລິະ ຫ້ວຍຊາຍຂາວ ແລະ ຈັກສູບນ້ຳແສນດິນ ສະເພາະໂຄງການອ່າງນ້ຳຊ່ວງມີເນື້ອທີ່ນາແຊງ 1.500 ເຮັກຕາ ແລະ ແຜນອະນາໄມລວງຄອງເໝືອງມີ 20.000 ກິໂລແມັດ ໃນວັນທີ 3 ພະຈິກ 2017 ນີ້
ແມ່ນໄດ້ອະນາໄມລວງຄອງ 1CP/1 ຢູ່ບ້ານພັດທະນາ ມີຄວາມຍາວ 2.200 ແມັດ ມີຈຳນວນຜູ້ນຳໃຊ້ນ້ຳເຂົ້າຮ່ວມ 200 ກວ່າຄົນ ແລະ ໃນຕໍ່ໜ້າແມ່ນຈະໄດ້ສືບຕໍ່ອະນາໄມລວງຄອງເໝືອງ ເປັນຕົ້ນແມ່ນບ້ານດົງບອງ ບ້ານແສນດິນ ແລະ ຊົນລະປະທານອ່າງນ້ຳຫຸມ ສ່ວນວ່າອ່າງຫ້ວຍຊອນ-ຫ້ວຍຊົ້ວ ແມ່ນໄດ້ອະນາໄມລວງຄອງເໝືອງສຳເລັດແລ້ວ ມີຄວາມຍາວ 5 ກິໂລແມັດ ທັງເພື່ອເປັນການຮັບຕ້ອນວັນທີ 3 ພະຈິກຂອງທຸກໆປີ ເປັນວັນສ້າງຂະບວນການອະນາໄມລວງຄອງເໝືອງ ແລະ ເລີ່ມເປີດນ້ຳຊົນລະປະທານໃຫ້ເປັນປະເພນີ ແລະ ນຳໄປຈັດຕັ້ງປະຕິບັດຢູ່ຂັ້ນເມືອງ ຂັ້ນບ້ານ ເພື່ອເປັນການຜັນຂະຫຍາຍເນື້ອໃນຈິດໃຈມະຕິກອງປະຊຸມ ຄັ້ງທີ X ຂອງພັກ ແລະ ສືບຕໍ່ການສ້າງຂະບວນການຮັກຊາດ ແລະ ພັດທະນາຕິດພັນກັບວຽກງານ 3 ສ້າງໃຫ້ປາກົດຜົນເປັນຈິງ.
________
ປະກາດ ຮ່ວມສ້າງຄວາມສຸກສູ່ສັງຄົມລາວ