ຕອນຄ່ຳຂອງວັນທີ 6 ພະຈິກ 2017, ທີ່ໂຮງແຮມແລນມາກ ນະຄອນຫຼວງຽງຈັນ, ໄດ້ຈັດງານລ້ຽງອາຫານຄ່ຳ ຕ້ອນຮັບ ແລະ ຊົມເຊີຍຜົນສຳເລັດກອງປະຊຸມສຸດຍອດສະຖາບັນກວດສອບສູງສຸດອາຊຽນ (ອາຊຽນຊາຍ) ຄັ້ງທີ 4, ທີ່ ນະຄອນຫຼວງວຽງຈັນ. ໂອກາດນີ້ ເປັນກຽດເຂົ້າຮ່ວມເປັນປະທານພິທີຂອງທ່ານ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ເລຂາຄະນະພັກ-ເຈົ້າຄອງນະຄອນຫຼວງວຽງຈັນ, ທ່ານນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ພ້ອມດ້ວຍບັນດາປະທານ ຫົວໜ້າສະຖາບັນກວດສອບສູງສຸດອາຊຽນບັນດາທູດປະເທດເພື່ອນມິດປະຈຳລາວ ແລະ ແຂກຖືກເຊີນທັງພາຍໃນ ແລະ ຕ່າງປະເທດ.
ສຳລັບກອງປະຊຸມຄັ້ງນີ້ ຈຸດປະສົງແມ່ນເພື່ອສ້າງຄວາມສາມາດ ແລະ ສົ່ງເສີມການຮ່ວມມືລະຫວ່າງປະເທດສະມາຊິກ ASEANSAI ດ້ວຍການແລກປ່ຽນຄວາມຮູ້ ແລະ ປະສົບການກ່ຽວກັບລະບຽບ ວິທີການກວດສອບໃນຂົງເຂດພາກລັດ ເພື່ອສ້າງຄວາມເຂັ້ມແຂງໃຫ້ສະຖາບັນກວດສອບສູງສຸດ ສ້າງເງື່ອນໄຂອຳນວຍຄວາມສະດວກໃຫ້ແກ່ການຮຽນຮູ້ລະຫວ່າງປະເທດສະມາຊິກ ASEANSAI ເປັນສູນກາງຂໍ້ມູນຂ່າວສານ ແລະ ຈຸດເຊື່ອມຕໍ່ການພົວພັນລະຫວ່າງ ASEANSAI ກັບອົງການຈັດຕັ້ງສາກົນ ແລະ ບັນດາສະຖາບັນກວດສອບໃນຂົງເຂດການກວດສອບພາກລັດ ASEANSAI ສ້າງຕັ້ງຂຶ້ນວັນທີ 16 ພະຈິກ 2011 ມີສະຖາບັນກວດສອບສູງສຸດ 10 ປະເທດອາຊຽນເປັນສະມາຊິກ ເຊິ່ງໄດ້ພ້ອມກັນພັດທະນາຕົນເອງຢ່າງບໍ່ຢຸດຢັ້ງ ເພື່ອບັນລຸເປົ້າໝາຍທີ່ໄດ້ຕັ້ງໄວ້ ໂດຍສຸມໃສ່ສ້າງຄວາມສາມາດດ້ານວິຊາສະເພາະກວດສອບຂະແໜງການພາກລັດ ໃຫ້ບັນດາສະຖາບັນກວດສອບປະເທດສະມາຊິກ ປະກອບສ່ວນເຂົ້າໃນການສ້າງລັດແຫ່ງກົດໝາຍ ແລະ ສົ່ງເສີມການປົກຄອງທີ່ດີ ນອກນີ້ຍັງໄດ້ເນັ້ນການພົວພັນຮ່ວມມືພາຍໃນ-ພາຍນອກ ເພື່ອຍົກສູງບົດບາດຂອງຕົນ.
ທ່ານ ສິນລະວົງ ຄຸດໄພທູນ ໄດ້ກ່າວເປີດພິທີດັ່ງກ່າວວ່າ: ນະຄອນຫຼວງວຽງຈັນ ເປັນກຽດຢ່າງສູງ ທີ່ໄດ້ຈັດງານລ້ຽງຕ້ອນຮັບ ແລະ ຊົມເຊີຍຜົນສຳເລັດຂອງກອງປະຊຸຸມ ຄັ້ງນີ້, ຊາວນະຄອນວຽງຈັນ ໄດ້ຕິດຕາມ ແລະ ຕີລາຄາສູງ ຕໍ່ການເດີນທາງມາເຄື່ອນໄຫວຢ້ຽມຢາມ ແລະ ເຂົ້າຮ່ວມກອງປະຊຸມໃນຄັ້ງນີ້, ຊື່ງເປັນເຫດການໜື່ງທີ່ສຳຄັນໃນການພົວພັນຮ່ວມມືລະຫວ່າງຊະມາຊິກອາຊຽນຊາຍ, ຂ້າພະເຈົ້າ ສະແດງຄວາມຊົມເຊີຍຜົນສຳເລັດຂອງກອງປະຊຸມດັ່ງກ່າວ ຊື່ງໄດ້ຮັບຮອງເອົາຫຼາຍບັນຫາສຳຄັນ ເປັນຕົ້ນ: ການແຕ່ງຕັ້ງກອງເລຂາອາຊຽນຊາຍ, ການແຕ່ງຕັ້ງຜູ້ກວດສອບເອກະສານລາຍງານການເງິນ, ການແຕ່ງຕັ້ງປະທານຂອງແຕ່ລະກຳມະການອາຊຽນຊາຍ ແລະ ຮັບຮອງເອົາແຜນການປະຕິບັດງານ ປະຈຳສົກປີ 2018-2019... ນີ້ສ່ອງແສງໃຫ້ເຫັນເຖິງການຢືນຢັນເຈດຕະນາລົມ ແລະ ການຮ່ວມມືທີ່ດີນຳກັນໃນຂົງເຂດວຽກງານກວດສອບທັງເປັນການເພີ່ມທະວີຮັດແໜ້ນສາຍພົວພັນ ແລະ ການຮ່ວມມືຂອງບັນດາປະເທດສະມາຊິກອາຊຽນຊາຍໃຫ້ແໜ້ນແຟ້ນຍີ່ງໆຂື້ນ.
______
ປະກາດ ຮ່ວມສ້າງຄວາມສຸກສູ່ສັງຄົມລາວ