ກະຊວງພະລັງງານ ແລະ ບໍ່ແຮ່ຈັດກອງປະຊຸມປຶກສາຫາລືກ່ຽວກັບຮ່າງນະໂຍບາຍພະລັງງານຂອງລາວ ໃນຕອນເຊົ້າມື້ນີ້, ທີ່ຫໍປະຊຸມແຫ່ງຊາດນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ຄຳມະນີ ອິນທິລາດ, ລັດຖະມົນຕີກະຊວງພະລັງງານ ແລະບໍ່ແຮ່ ມີຜູ້ຕາງໜ້າຈາກບັນດາກະຊວງ, ກົມກ່ຽວຂ້ອງ ແລະ ພະແນກພະລັງງານ ແລະບໍ່ແຮ່ບັນດາແຂວງທົ່ວປະເທດເຂົ້າຮ່ວມ.
ກອງປະຊຸມຄັ້ງນີ້ຈັດຂື້ນເພື່ອປຶກສາຫາລື ແລະຜ່ານຮ່າງນະໂຍບາຍພະລັງງານຂອງລາວແບບເປີດກ້ວາງກ່ອນຈະນຳເຂົ້າຜ່ານກອງປະຊຸມລັດຖະບານສະໄໝສາມັນປະຈຳເດືອນກໍລະກົດນີ້, ຮ່າງນະໂຍບາຍພະລັງງານຂອງລາວສ້າງຂື້ນເພື່ອຄວາມຍືນຍົງ ແລະ ຄວາມໜັ້ນຄົງດ້ານພະລັງງານ ໂດຍເນັ້ນໜັກໃສ່ການພັດທະນາບັນດາແຫລ່ງພະລັງງານທີ່ເປັນທ່າແຮງພາຍໃນປະເທດແບບປະສົມປະສານ ແລະມີຄວາມຫລາກຫລາຍບົນພື້ນຖານຕາມກົນໄກຕະຫລາດພະລັງງານ, ຫລຸດຜ່ອນການນຳເຂົ້າພະລັງງານຈາກຕ່າງປະເທດ, ຊຸກຍູ້ພາກສ່ວນບູລິມະສິດຂອງລັດຖະບານ, ການສົ່ງເສີມການອະນຸລັກ ແລະປະຢັດພະລັງງານ ເພີ່ມທະວີການຮ່ວມມື ແລະສົ່ງອອກດ້ານພະລັງງານໃຫ້ຫລາຍຂື້ນ ເພື່ອປະກອບສ່ວນສ້າງລາຍຮັບເຂົ້າປະເທດ.
ຮ່າງນະໂຍບາຍພະລັງງານຂອງລາວສະບັບນີ້ ພາຍຫລັງຜ່ານການຮັບຮອງຈະເປັນບ່ອນອີງສຳຄັນໃຫ້ແກ່ການພັດທະນາຂະແໜງການຕາມເປົ້າໜາຍການພັດທະນາເສດຖະກິດ - ສັງຄົມແຫ່ງຊາດ ແລະສະໜັບສະໜູນວິໄສທັດ, ແຜນຍຸດທະສາດ ແລະແຜນພັດທະນາຂອງລັດຖະບານ ລວມເຖິງການຈັດຕັ້ງປະຕິບັດບັນດາເອກະສານທີ່ສຳຄັນຂອງກະຊວງພະລັງງານ ແລະບໍ່ແຮ່ ເປັນຕົ້ນວິໄສທັດຮອດປີ 2030, ຍຸດທະສາດການພັດທະນາ 2025, ແຜນພັດທະນາພະລັງງານ ແລະບໍ່ແຮ່ 5 ປີຄັ້ງທີ 8 ນັບແຕ່ 2016 ຫາ 2020.
ພາບແລະຂ່າວ: ວິທະຍຸກະຈາຍສຽງແຫ່ງຊາດ
________
ປະກາດ ຮ່ວມສ້າງຄວາມສຸກສູ່ສັງຄົມລາວ
