ໂຮງຮຽນປະຖົມ ແລະ ມັດທະຍົມສົມບູນສິນໄຊ ເມືອງຈັນທະບູລີ ນະຄອນຫຼວງວຽງຈັນ ໄດ້ຮັບລາງວັນໂຮງຮຽນນິເວດອາຊຽນຊັ້ນມັດທະຍົມ ປີ 2019 ສ່ວນຊັ້ນປະຖົມແມ່ນໂຮງຮຽນຊະນະພົນ ເມືອງສີໂຄດຕະບອງ ອັນໄດ້ນຳເອົາຊື່ສຽງມາສູ່ປະເທດຊາດ ກໍຄື ຂະແໜງການສຶກສາຂອງລາວເຮົາ ພິທີມອບ-ຮັບລາງວັນໂຮງຮຽນນິເວດອາຊຽນ ໄດ້ຈັດຂຶ້ນທີ່ນະຄອນຊຽງລຽບ ລາຊະອານາຈັກກຳປູເຈຍ ໃຫ້ກຽດມອບລາງວັນໂດຍທ່ານເລຂາທິການໃຫຍ່ອາຊຽນ ມີທ່ານລັດຖະມົນຕີກະຊວງສິ່ງແວດລ້ອມກຳປູເຈຍ ແລະ ຕາງໜ້າຈາກ 10 ປະເທດອາຊຽນເຂົ້າຮ່ວມ.
ໂຮງຮຽນສິນໄຊ ເປັນໜຶ່ງໃນໂຮງຮຽນແຫ່ງອື່ນໆທີ່ໄດ້ເອົາໃຈໃສ່ ການຮຽນ-ການສອນ ປະຕິບັດຫຼັກສູດຂອງກະຊວງສຶກສາທິການ ແລະ ກີລາວາງອອກ ແລະ ຮັບປະກັນໃຫ້ໄດ້ 5 ຫຼັກມູນການສຶກສາ ແລະ 3 ລັກສະນະ ຄຽງຄູ່ກັນນີ້ ໂຮງຮຽນຍັງໄດ້ເອົາໃຈໃສ່ສຶກສາອົບຮົມນັກຮຽນໃຫ້ຮູ້ຈັກຮັກສາສິ່ງແວດລ້ອມ ໂດຍນຳພາພວກເຂົາບໍ່ຖິ້ມຂີ້ເຫຍື່ອຊະຊາຍ ອັນສຳຄັນໄດ້ສືບເນື່ອງຈາກໂຄງການທີ່ໂຮງຮຽນໄດ້ຮັບທຸງໄຊປະເພດ 1 ໂຮງຮຽນສີຂຽວສະອາດ ແລະ ມີຄຸນນະພາບຂັ້ນພະແນກສຶກສາທິການ ແລະ ກີລາ ນະຄອນຫຼວງວຽງຈັນຊຸດທຳອິດ ທີ່ໄດ້ສືບຕໍ່ນຳພານັກຮຽນຮັກສາສິ່ງແວດລ້ອມ ດ້ວຍການປູກຈິດສຳນຶກໃນການແຍກຂີ້ເຫຍື່ອ ກໍຄື ນຳໃຊ້ສິ່ງເສດເຫຼືອໃຫ້ເປັນປະໂຫຍດ.
ເປັນຕົ້ນ ໄດ້ນຳໃຊ້ສິ່ງເສດເຫຼືອອາຫານພືດຜັກ ມາເຮັດຝຸ່ນຊີວະພາບ ແລະ ນ້ຳໝັກທີ່ປອດສານພິດເພື່ອຫົດຕົ້ນໄມ້ ດອກໄມ້ຕ່າງໆ ມີສວນສາທິດປູກພືດຜັກ ແລະ ນາເຂົ້າ ເພື່ອໃຫ້ນັກຮຽນໄດ້ຮຽນຮູ້ກະສິກຳເປັນ ຕົ້ນ ວິທີປູກຜັກ ແລະ ປູກເຂົ້າ ເພື່ອນຳໄປເຮັດຢູ່ເຮືອນ ມີສະໝຸນໄພປູກຕົ້ນໄມ້ເປັນຢາຫຼາຍຊະນິດໃຫ້ນັກຮຽນ ໄດ້ສຶກສາຮຽນຮູ້.
ນອກນີ້ ໂຮງຮຽນຍັງນຳໃຊ້ຕຸກນ້ຳດື່ມມາປະດິດສ້າງເປັນສື່ ການຮຽນ-ການສອນ ສ້າງເປັນສິ່ງປະດິດເຂົ້າຮ່ວມການແຂ່ງຂັນໄດ້ຮັບລາງວັນທີ 1 ຫຼາຍຄັ້ງ ຂາຍເອົາເງິນ ແລະອື່ນໆ ຍ້ອນຜົນງານດັ່ງກ່າວນັ້ນ ໂຮງຮຽນສິນໄຊຈຶ່ງໄດ້ຖືກຄັດເລືອກເປັນຕົວແທນໃຫ້ ສປປ ລາວ ໄປຮັບລາງວັນໂຮງຮຽນນິເວດອາຊຽນ ຄັ້ງທີ 3 ປີ 2019 ຮ່ວມກັບບັນດາໂຮງຮຽນ 9 ປະເທດອາຊຽນ ອັນໄດ້ນຳເອົາຊື່ສຽງມາສູ່ປະເທດຊາດ ກໍຄື ນະຄອນຫຼວງວຽງຈັນ ແລະ ໂຮງຮຽນສິນໄຊ.
ແຫຼ່ງຂໍ້ມູນ: ໜັງສຶພິມວຽງຈັນໃໝ່
