ເຈົ້າໜ້າທີ່ສັນນິຖານ ກ່ຽວກັບການເສຍຊີວິດຂອງຜູ້ຊາຍຢູ່ໃນລົດກະບະຣີໂວ້ ທີ່ຈອດໄວ້ຢູ່ເສັ້ນທາງເລກ 13 ເໜືອ ຢູ່ເຂດບ້ານໂຮມໄຊ ເມືອງໄຊ ແຂວງອຸດົມໄຊ ໃນວັນທີ 5 ສິງຫາ 2019 ທີ່ສັງຄົມສື່ອອນລາຍ ສ່ວນຫຼາຍມີຄໍາເຫັນໄປໃນທາງທີ່ຖືກຄາດຕະກໍາ. ຫຼ້າສຸດ ເຈົ້າໜ້າທີ່ ປກສ ແຂວງອຸດົມໄຊ ໄດ້ເປີດເຜີຍວ່າ ຜົນການສັນນະສູດເບື້ອງຕົ້ນການເສຍຊີວິດຜູ້ກ່ຽວແມ່ນຍ້ອນຂາດອາກາດຫາຍໃຈ ເຊິ່ງຜູ້ກຽວອາດຂ້າຕົວຕາຍ.
ປັດຈຸບັນ ເຈົ້າໜ້າຕຳຫຼວດຍັງສືບຕໍ່ດໍາເນີນການສືບສວນ-ສອບສວນ ເພື່ອໃຫ້ຮູ້ລາຍລະອຽດຈະແຈ້ງ.ພັຕ ຄຳແສນ ສຸພັນພາລີ ຮອງຫົວໜ້າພະແນກ ສືບສວນ-ສອບສວນຫ້ອງຕຳຫຼວດ ກອງບັນຊາການ ປກສ ແຂວງອຸດົມໄຊ ໃຫ້ສຳພາດວ່າ: ເວລາ 7:30 ໂມງ ຂອງວັນທີ 5 ສິງຫາ 2019 ໄດ້ຮັບແຈ້ງຄວາມຜ່ານທາງ ໂທລະສັບວ່າ ພົບຄົນເສຍຊີວິດຢູ່ໃນລົດກະບະຣີໂວ້ ຢູ່ເຂດບ້ານໂຮມໄຊ ເມືອງໄຊ. ຈາກນັ້ນ ເຈົ້າໜ້າທີ່ໄດ້ຈັດ ຕັ້ງກຳລັງປະສານສົມທົບກັບບັນດາພາກສ່ວນທີ່ກ່ຽວຂ້ອງ ເພື່ອດຳເນີນການກວດກາຊັນນະສູດສະຖານທີ່ ເກີດເຫດ.ຜ່ານການກວດກາ ພົບເຫັນບັດປະຈໍາຕົວຜູ້ເສຍຊີວິດ ຊື່ ທ້າວ ເມດຕາ ສິລີພົງ ອາຍຸ 36 ປີ ອາຊີບພະນັກ ງານ ເກີດທີ່ ແຂວງວຽງຈັນ.
ບ້ານຢູ່ປັດຈຸບັນ ບ້ານຈອມມະນີເໜືອ ເມືອງໄຊເສດຖາ ນະຄອນຫຼວງວຽງຈັນ ສະພາບສົບຢູ່ໃນທ່ານອນຫງາຍຢູ່ເທິງເບາະນັ່ງລົດຍີ່ຫໍ້ຣີໂວ້ ສີຂາວໝາຍທະບຽນ ກຳແພງນະຄອນ ກຣ 2871 ເຊິ່ງຕົນຕົວມີຮ່ອງຮອຍກຳດຳ ມີເລືອດໄຫຼອອກຢູ່ປາກ ແລະ ດັງ ຢູ່ພາຍໃນລົດມີເຕົາໄຟຂີ່ເຖົ່າ ແລະ ຖ່ານທີ່ໄໝ້ແລ້ວ ສ່ວນຕັບໂລລົດເປືອຍຍ່ອຍອອກ ຍ້ອນຖືກຄວາມຮ້ອນຂອງໄຟ.ພັຕ ຄຳແສນ ສຸພັນພາລີ ໃຫ້ຮູ້ຕື່ມອີກວ່າ: ຕາມການກວດສອບ ແລະ ສັນນະສູດແລ້ວ ເຈົ້າໜ້າທີ່ສັນນິຖານວ່າຜູ້ກ່ຽວອາດຂ້າຕົວເອງຕາຍ ເນື່ອງຈາກບໍ່ພົບຮອງຮອຍການຕໍ່ສູ້ໃດໆ ແລະ ຜູ້ກ່ຽວໄດ້ດັງໄຟໃສ່ເຕົາ. ຈາກນັ້ນ ເອົາເຕົາໄຟເຂົ້າໄປປະຢູ່ໃນລົດ ເບື້ອງຄົນຂັບລົງ ພ້ອມທັງອັດແວນທຸກດ້ານບໍ່ໃຫ້ມີອາກາດຖ່າຍເທ. ຈາກນັ້ນ ຜູ້ກ່ຽວນອນເທີ້ງຢູ່ໃນລົດ ເຊິ່ງເຈົ້າໜ້າທີ່ ຄາດວ່າເສຍຊີວິດມາແລ້ວ 40 ກວ່າຊົ່ວໂມງ.ຕາມການສອບຖາມເຈົ້າຂອງທີ່ດິນ ຊື່ ທ່ານ ຊຽງແພງ ຢູ່ບ້ານປ່າສັກ ເມືອງໄຊ ແຂວງອຸດົມໄຊ
ວ່າ: ໄດ້ໄປ-ມາ ເພື່ອກວດກາດິນຂອງຕົນທຸກວັນ ເນື່ອງຈາກວ່າ ກຳລັງຖົມດິນເພື່ອປັບປຸງດິນໃຫ້ຮາບພຽງ ຜ່ານມາກໍເຄີຍມີ ຄົນມັກນຳເອົາລົດຂະໜາດຕ່າງໆມາຈອດພັກຜ່ອນຢູ່ດິນຂອງຕົນ ເຊິ່ງຄັ້ງນີ້ ພົບເຫັນກະບະຣີໂວ້ ຈອດຢູ່ຜິດສັງ ເກດ. ມາໃນຕອນເຊົ້າຂອງວັນ ທີ 3 ສິງຫາ ຈຶ່ງໄດ້ເຂົ້າໄປຫາ ພ້ອມທັງເອີ້ນຖາມຜູ້ກ່ຽວ (ຕອນນັ້ນຍັງມີຊີວິດ) ວ່າ: ເຈົ້າມາຫຍັງ ແລະ ຈະໄປໃສ ຜູ້ກ່ຽວກໍໄຂປະຕູແລ້ວລົງຈາກລົດ ແລ້ວຕອບວ່າ ມາຖ້າໝູ່ຢູ່ນີ້. ມາຮອດວັນທີ 4 ສິງຫາ ມາເບິ່ງດິນອີກເທື່ອໜຶ່ງ ແຕ່ກໍຍັງເຫັນລົດຄັນເກົ່າຈອດຢູ່ໃນສະພາບເດີມ. ແຕ່ບໍ່ໄດ້ເຂົ້າໄປຖາມ ອີກ. ຈົນຮອດຕອນເຊົ້າວັນທີ 5 ສິງຫາ ເປັນມື້ທີ່ສາມ ຈຶ່ງໄດ້ຮັບຂ່າວວ່າ ມີຄົນເສຍຊີວິດຢູ່ໃນລົດທີ່ຈອດໄວ້ຢູ່ດິນຂອງຕົນ ເຊິ່ງເຈົ້າໜ້າທີ່ສັນນິຖານວ່າ ຜູ້ກ່ຽວອາດຂ້າຕົວເອງຕາຍ ຍ້ອນມີບັນຫາສ່ວນຕົວ.
ທີ່ມາ ນສພ ຄວາມສະຫງົບ
