ຈັບກຸມແກ້ງລັກລົດຈັກ ພ້ອມຂະຫຍາຍໄດ້ ຜູ້ຊື້-ຂາຍຊັບຜິດກົດໝາຍ

ໃນອາທິດຜ່ານມາ, ເຈົ້າໜ້າທີ່ຕໍາຫຼວດ ໄດ້ຖະແຫຼງຂ່າວວ່າ ຜູ້ຖືກຫາ ທັງ 4 ຄົນ ມີດັ່ງຕໍ່ໄປນີ້:

· ທ້າວ ຈິດຕະພົງ ອາຍຸ 25 ປີ ຢູ່ບ້ານສົມຫວັງໃຕ້ ເມືອງຫາດຊາຍຟອງ ຖືກກັກຕົວ ໃນວັນທີ 22 ກໍລະກົດ.

· ທ້າວ ໄຕນະພາ ຫຼື ຊິນ ອາຍຸ 22 ປີ ຢູ່ບ້ານໂພນປ່າເປົ້າ ເມືອງສີສັດຕະນາກ ຖືກກັກຕົວ ໃນວັນທີ 23 ກໍລະກົດ.

· ທ້າວ ອານຸຈັນ ອາຍຸ 30 ປີ ຢູ່ບ້ານໂສກປ່າຫຼວງ ເມືອງສີສັດຕະນາກ ຖືກກັກຕົວ ໃນວັນທີ 23 ກໍລະກົດ.

· ທ້າວ ພອນສັກ ອາຍຸ 28 ປີ ຢູ່ບ້ານນາໂຮມ ເມືອງຮຸນ ແຂວງອຸດົມໄຊ ຖືກກັກຕົວ ໃນວັນທີ 24 ກໍລະກົດ.

ຜ່ານການສອບສວນຂອງເຈົ້າໜ້າທີ່, ທ້າວ ຈິດຕະພົງ ໄດ້ຮັບສາລະພາບ ວ່າ:



ໃນວັນ ທີ 19 ກໍລະກົດ 2019, ໄດ້ໄປຫຼິ້ນເກມ ຢູ່ບ້ານດອນກອຍ ເມືອງສີສັດຕະນາກ ຈົນຮອດເວລາ 13:00 ໂມງ ກໍກັບບ້ານ, ແຕ່ພໍຂີ່ລົດຮອດທາງຮ່ອມ 14 ບ້ານດອນກອຍ ພົບເຫັນລົດຈັກຮອນດ້າເວບ 100 ສີຟ້າ ຈອດຢູ່ ພ້ອມທັງສຽບກະແຈຄາລົດໄວ້, ຈຶ່ງໄດ້ເຂົ້າໄປຂີ່ເອົາລົດຄັນດັ່ງກ່າວໜີໄປ ແລ້ວໄດ້ປົດປ້າຍຖິ້ມຢູ່ປ່າຂ້າງທາງເຂດບ້ານດອນດູ່ ເມືອງຫາດຊາຍຟອງ.

ຫຼັງຈາກນັ້ນ, ໄດ້ເອົາລົດໄປຂາຍໃຫ້ ທ້າວ ກອງຄໍາ ຫຼື ຕິ່່ງມ່ອງ ອາຍຸ 19 ປີ ບ້ານທ່າງ່ອນ ເມືອງໄຊທານີ ໃນລາຄາ 2.500.000 ກີບ.

ທ້າວ ພອນສັກ ແລະ ທ້າວ ໄຕນະພາ ທັງ 2 ກໍໄດ້ຮັບສາລະພາບ ວ່າ:

ໃນເດືອນກໍລະກົດ 2019, ໄດ້ພາກັນຂີ່ລົດເລາະຕາມເສັ້ນທາງ ຂອບເຂດນະຄອນຫຼວງວຽງຈັນ ພໍຂີ່ໄປຮອດເຂດບ້ານໂນນແສງຈັນ ເມືອງໄຊທານີ ພົບເຫັນລົດຈັກຮອນດ້າເວບ 100 ສີປອນ ຈອດຢູ່ຕໍ່ໜ້າຮ້ານແປງລົດ; ຈາກນັ້ນ, ທ້າວ ພອນສັກ ຈຶ່ງໄດ້ເຂົ້າໄປຫັກຄໍໃຫ້ ທ້າວ ໄຕນະພາ ຂີ່ອອກໄປຫາ ທ້າວ ແຫຼວທອງ ຫຼື ແຫຼ້ ອາຍຸ 36 ປີ ຢູ່ບ້ານໂສກປ່າຫຼວງ.

· ຕໍ່ມາໄດ້ 2 ວັນ, ທ້າວ ແຫຼ້ ກໍເອົາໄປຂາຍໃຫ້ຜູ້ຍິງບໍ່ຮູ້ຊື່ ຢູ່ເຂດບ້ານທ່າງ່ອນ ເມືອງໄຊທານີ ຈໍານວນ 1.000.000 ກີບ.

ນອກຈາກລັກນໍາ ທ້າວ ໄຕນະພາ ແລ້ວ, ທ້າວ ພອນສັກ ຍັງໄດ້ເຄື່ອນໄຫວລັກລົດຈັກອີກຈໍານວນ 4 ຄັນ ເຊິ່ງລົດທີ່ລັກມາໄດ້ ແມ່ນໃຫ້ ທ້າວ ແຫຼ້ ເອົາໄປຂາຍ ແລ້ວເອົາເງິນມາແບ່ງປັນກັນ, ສ່ວນລົດທີ່ລັກມາໄດ້ ມີຄື:

· ເປັນລົດຮອນດ້າເວບ 100 ຈໍານວນ 2 ຄັນ.

· ລົດຮອນດ້າຊູໂມເອັກ ຈໍານວນ 1 ຄັນ.
· ລົດຢາມາຮາຟີໂນ້ ຈໍາ ນວນ 1 ຄັນ.

ສ່ວນທາງດ້ານ ທ້າວ ອານຸຈັນ ຮັບສາລະພາບ ວ່າ:

ຜ່ານມາ, ໄດ້ເຄື່ອນໄຫວລັກລົດຈັກມາແລ້ວ 2 ຄັ້ງ ຄື: ໃນເດືອນມິຖຸນາ 2019, ໄດ້ເອົາໄປລັກລົດຈັກຮອນດ້າເວບ 100 ສີແດງດໍາ ຈໍານວນ 2 ຄັນ ຢູ່ບ້ານພ້າວ ເມືອງຫາດຊາຍຟອງ ກ່ອນຈະໄປຫຼິ້ນຮ້ານເກມ ເຂດບ້ານໂພນປ່າເປົ້າ ຈຶ່ງໄດ້ຮູ້ຈັກກັບ ທ້າວ ແຫຼ້ ບ້ານໂສກປ່າຫຼວງ ພ້ອມທັງໄດ້ບອກ ທ້າວ ແຫຼ້ ເອົາລົດທັງ 2 ຄັນ ໄປຂາຍໃຫ້ຕົນ ແຕ່ບໍ່ຮູ້ວ່າຂາຍໃຫ້ໃຜ ແລະ ທ້າວ ແຫຼ້ ກໍເອົາເງິນ ຈໍານວນ 6.000 ບາດ ແລະ 2.000.000 ກີບ ມາໃຫ້ຕົນ ແລ້ວຍັງໄດ້ແບ່ງເງິນຈໍານວນໜຶ່ງໃຫ້ຜູ້ກ່ຽວອີກ.

ປັດຈຸບັນ, ຕໍ່ກັບ ຜູ້ທີ່ຖືກຊັດທອດຫາ ວ່າເປັນ ຜູ້ຮັບຊື້-ຂາຍຊັບຜິດກົດໝາຍ ຈາກພວກກ່ຽວ ຈໍານວນ 5 ຄົນ ຄື:

· ທ້າວ ແຫຼວທອງ ຫຼື ແຫຼ້ ອາຍຸ 36 ປີ ຢູ່ບ້ານໂສກປ່າຫຼວງ ເມືອງສີສັດຕະນາກ.

· ທ້າວ ກອງຄໍາ ຫຼື ຕິ່ງມ່ອງ ອາຍຸ 19 ປີ ຢູ່ບ້ານທ່າງອນ ເມືອງໄຊທານີ.

· ນາງ ນູ່ນີ່ ອາຍຸ 22 ປີ ຢູ່ບ້ານທ່າງອນ ເມືອງໄຊທານີ.

· ນາງ ບົວສະຫວັນ ອາຍຸ 21 ປີ ຢູ່ບ້ານໂພໄຊ ເມືອງຄໍາ ແຂວງຊຽງຂວາງ.

· ທ້າວ ພິມພອນ ຫຼື ປໍ້າ ອາຍຸ 32 ປີ ຢູ່ບ້ານນາເພີງ ເມືອງແປກ ແຂວງຊຽງຂວາງ.

ທາງເຈົ້າໜ້າທີ່ ໄດ້ກັກຕົວພວກກ່ຽວຈໍານວນດັ່ງກ່າວ ເປັນທີ່ຮຽບຮ້ອຍແລ້ວ ແຕ່ຍັງຢູ່ໃນຂັ້ນຕອນ ການສອບສວນດໍາເນີນຄະດີ ຕໍ່ໄປ.

ສໍາລັບລົດຈັກທີ່ລັກມາ, ເຈົ້າໜ້າທີ່ ແມ່ນສາມາດເກັບກູ້ຄືນໄດ້ຈໍານວນໜຶ່ງ ແລະ ໄດ້ມອບລົດຈໍານວນດັ່ງກ່າວຄືນໃຫ້ເຈົ້າຂອງເດີມແລ້ວ, ເຊິ່ງຕາງໜ້າມອບໂດຍ ພັທ ທອງສະຫວັດ ແສນສຸວາດ ຫົວໜ້າກອງບັນຊາການ ປກສ ເມືອງສີສັດຕະນາກ.