ໃນວັນທີ 21 ກັນຍາ 2017, ທີ່ ກະຊວງການຕ່າງປະເທດ ທ່ານ ພູໂຂງ ສີສຸລາດ ຫົວໜ້າກົມສົນທິສັນຍາ ແລະ ກົດໝາຍ ກະຊວງການຕ່າງປເທດ, ຜູ້ຕາງໜ້າຂອງ ສປປ ລາວ ປະຈໍາຄະນະກໍາມາທິການ ລະຫວ່າງ ລັດຖະບານອາຊຽນ ວ່າດ້ວຍ ສິດທິມະນຸດ (AICHR) ໄດ້ເປັນປະທານ ໃນພິທີມອບລາງວັນ ແຂ່ງຂັນວິດີໂອສັ້ນຊາວໜຸ່ມອາຊຽນ ລະດັບປະເທດ ພາຍໃຕ້ຫົວຂໍ້: “ອາຊຽນຕ້ານການຄ້າມະນຸດ: ມະນຸດບໍ່ໄດ້ມີເພື່ອຂາຍ”,ໂດຍການເຂົ້າຮ່ວມ ຂອງຄະນະກົມອາຊຽນ, ບັນດາຄະນະກຳມະການ ຕັດສິນການແຂ່ງຂັນ, ຕາງໜ້າຈາກກະຊວງ ປ້ອງກັນຄວາມສະຫງົບ, ສູນກາງສະຫະພັນແມ່ຍິງລາວ ແລະ ສູນກາງຊາວໜຸ່ມ ປະຊາຊົນປະຕິວັດລາວ, ພ້ອມດ້ວຍຜູ້ຕາງໜ້າຈາກ ພາກສ່ວນທີ່ກ່ຽວຂ້ອງ.
ທີມທີ່ໄດ້ຮັບລາງວັນຊະນະເລີດອັນດັບ 1 ໃນການແຂ່ງຂັນໃນຄັ້ງນີ້, ໄດ້ແກ່ທີມ “Me-O” ໄດ້ຮັບລາງວັນເປັນເງິນສົດ ຈາກ ຄະນະກໍາມາທິການ ລະຫວ່າງ ລັດຖະບານອາຊຽນ ວ່າດ້ວຍສິດທິມະນຸດ (AICHR) 500 ໂດລາສະຫະລັດ. ຜົນງານຂອງທິມຊະນະເລີດຈາກ ສປປ ລາວ ຈະຖືກສົ່ງເຂົ້າແຂ່ງຂັນຕໍ່ ເພື່ອຊິງລາງວັນລະດັບອາຊຽນ ແລະ ລາງວັນຂວັນໃຈປະຊາຊົນອີກດ້ວຍ, ຊຶ່ງຈະມີການພິຈາລະນາຕັດສິນໃຫ້ລາງວັນດັ່ງກ່າວ ຢູ່ກອງເລຂາອາຊຽນ ນະຄອນຫລວງຈາກາກຕາ ປະເທດອິນໂດເນເຊຍ ໃນທ້າຍເດືອນກັນຍານີ້.
ການແຂ່ງຂັນວິດີໂອສັ້ນດັ່ງກ່າວ, ແມ່ນກິດຈະກໍາຮ່ວມລະຫວ່າງຄະນະກໍາມາທິການ ລະຫວ່າງລັດຖະບານອາຊຽນ ວ່າດ້ວຍສິດທີມະນຸດ (AICHR) ແລະ ຄະນະກໍາມະການຜູ້ຕາງໜ້າຖາວອນປະຈໍາອາຊຽນ (CPR) ຈັດຂຶ້ນ, ເພື່ອແນໃສ່ເປີດໂອກາດໃຫ້ຊາວຫນຸ່ມຂອງປະເທດສະມາຊິກອາຊຽນ ໄດ້ສະແດງຄວາມສາມາດ ແລະ ສົ່ງເສີມຄວາມຮັບຮູ້ ແລະ ຄວາມເຂົ້າໃຈກ່ຽວກັບຜົນຮ້າຍການຄ້າມະນຸດຢູ່ປະເທດຂອງຕົນ ກໍຄື ໃນພາກພື້ນອາຊຽນ ແລະ ທັງເປັນການໂຄສະນາເຜີຍແຜ່ນະໂຍບາຍ ແລະ ມາດຕະການຂອງປະເທດ ແລະ ພາກພື້ນອາຊຽນ ໃນການຕ້ານການຄ້າມະນຸດ.
________
ປະກາດ ຮ່ວມສ້າງຄວາມສຸກສູ່ສັງຄົມລາວ
