ໃນວັນທີ 15 ສິງຫາ 2017 ນີ້ ເມືອງໄຊຍະບູລີ ແລະ ຄອບຄົວທ່ານເຈົ້າແຂວງໄຊຍະບູລີ ນຳເອົາເຄື່ອງຊ່ວຍເຫຼືອວັດຖຸປັດໃຈບັນເທົາທຸກແລະເງິນຈໍານວນໜື່ງໄປມອບໃຫ້ຄອບຄົວທີ່ຖືກຜົນກະທົບຈາກໄພທໍາມະຊາດຢູ່ທີ່ບ້ານໜອງ ເມືອງແກ່ນທ້າວ ແຂວງໄຊຍະບູລີ. ເຊີ່ງນໍາໂດຍທ່ານຄໍາສິງ ສໍລະສຸກ, ກໍາມະການປະຈໍາພັກແຂວງ, ເລຂາພັກເມືອງ, ເຈົ້າເມືອງໄຊຍະບູລີ ພ້ອມດ້ວຍຄະນະນໍາຂອງເມືອງໄຊຍະບູລີ, ມີທ່ານ ນາງ ບຸນໄທ ສິດທະວົງພາລະຍາເຈົ້າແຂວງໄຊຍະບູລີ ພ້ອມຄະນະ ແລະ ລູກຫຼານ.
ໂດຍໄດ້ຮັບການຕ້ອນຮັບຢ່າງອົບອຸ່ນຈາກທ່ານ ສໍາລາມ ສຸວັນນະໂຊກ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆແກ່ນທ້າວ ພ້ອມດ້ວຍການນໍາຂອງເມືອງ, ອໍານາດການປົກບ້ານ ແລະ ພໍ່ແມ່ປະຊາຊົນທີ່ຖືກຜົກກະທົບພາຍໃນ 2 ບ້ານເຂົ້າຮ່ວມ.
ບ້ານທີ່ຖືກຜົນກະທົບຈາກໄພທໍາມະຊາດມີ 6 ບ້ານ, ໃນນີ້ບ້ານທີ່ຖືກຜົນກະທົບຮ້າຍແຮງກ່ວາໝູ່ມີ 2 ບ້ານຄື: ບ້ານໜອງ 59 ຄອບຄົວ ແລະ ບ້ານປົ່ງແດງ 40 ຄອບຄົວ, ເສຍຊີວິດ 1 ຄົນ ແລະເຮັດໃຫ້ເຮືອນຊານບ້ານຊ່ອງ, ຜົນຜະລິດ, ສັດສາວາສິ່ງຂອງພໍ່ແມ່ປະຊາຊົນພາຍໃນ 2 ບ້ານມີຄວາມເສຍຫາຍຢ່າງໜັກໜ່ວງ ລວມມູນຄ່າເສຍຫາຍທັງໝົດ 15 ຕື້ 600 ລ້ານກ່ວາກີບ.
ເຄື່ອງວັດຖຸປັດໃຈທີ່ນໍາມາມອບໃນຄັ້ງນີ້ ປະກອບມີ: ເຂົ້າສານ, ຜ້າຮົ່ມ, ໝີ່, ນໍ້າດື່ມ, ເຄື່ອງນຸ່ງນັກຮຽນ, ປື້ມຂຽນ, ກະເບື້ອງ ແລະ ເງິນຈໍານວນໜື່ງ ລວມມູນຄ່າທັງໝົດ 37 ລ້ານກ່ວາກີບ; ໃນນີ້ເມືອງໄຊຍະບູລີຊ່ວຍເຫຼືອເຂົ້າສານ 500 ກິໂລ, ຜ້າຮົ່ມ 20 ຜືນ, ໝີ່ 20 ແກັບ, ນໍ້າດື່ມ 20 ແກັດ ພ້ອມເງິນສົດ 5 ລ້ານກີບ ລວມມູນຄ່າ 9 ລ້ານ 5 ແສນກີບ;
ຄອບຄົວທ່ານເຈົ້າແຂວງໄຊຍະບູລີ ຊ່ວຍເຫຼືອກະເບື້ອງ 1500 ແຜ່ນ ມູນຄ່າ 18 ລ້ານ 7 ແສນກ່ວາກີບ ແລະ ລູກຊາຍຂອງທ່ານເຈົ້າແຂວງ ຊ່ວຍເຫຼືອເຄື່ອງນຸ່ງນັກຮຽນ ແລະ ປື້ມຂຽນ ມູນຄ່າ 9 ລ້ານກີບ.
ໃຫ້ກຽດກ່າວມອບຂອງທ່ານ ຄໍາສິງ ສໍລະສຸກ, ກໍາມະການປະຈໍາພັກແຂວງ, ເຈົ້າເມືອງໄຊຍະບູລີ, ທ່ານ ນາງ ບຸນໄທ ສິດທະວົງ ພ້ອມດ້ວຍຄະນະລູກຫຼານ ແລະ ກ່າວຮັບໂດຍທ່ານ ສໍາລາມ ສຸວັນນະໂຊກ, ເຈົ້າມືອງໆແກ່ນທ້າວ ແລະ ອໍານາດການປົກຄອງບ້ານທີ່ຖືກຜົນກະທົບ ໂດຍຊ່ອງໜ້າພາກສ່ວນທີ່ກຽ່ວຂ້ອງເຂົ້າຮ່ວມເປັນສະຂີພິຍານ, ເຄື່ອງວັດຖຸປັດໃຈດັ່ງກ່າວແມ່ນໄດ້ຮັບການສະໜັບສະໜູນຈາກຄອບຄົວທ່ານເຈົ້າແຂວງໄຊຍະບູລີ, ການນໍາຂອງເມືອງໄຊຍະບູລີ, ຫ້ອງການ, ອົງການ, ກົມກອງ ອ້ອມຂ້າງເມືອງໄຊຍະບູລີ.
ໃນໂອກາດດຽວກັນນີ້ ທ່ານ ສໍາລາມ ສຸວັນນະໂຊກ, ເຈົ້າເມືອງໆແກ່ນທ້າວ ກໍ່ໄດ້ຕາງໜ້າອໍານາດການປົກຄອງ ແລະ ພໍ່ແມ່ປະຊາຊົນ ກໍ່ຄືຄອບຄົວທີ່ຖືກຜົນກະທົບ ກ່າວສະແດງຄວາມຄອບອົກຂອບໃຈ, ຄວາມຮູ້ບຸນຄຸນຢ່າງສູງຕໍ່ກັບ ເມືອງໄຊຍະບູລີ ແລະ ຄອບຄົວທ່ານເຈົ້າແຂວງໄຊຍະບູລີ ທີ່ໄດ້ໃຫ້ຄວາມເປັນຫ່ວງເປັນໄຈ ທີ່ນໍາເອົາເຄື່ອງຊ່ວຍເຫຼືອວັດຖຸປັດໃຈມາມອບໃຫ້ໃນຄັ້ງນີ້ ຈະໃຫ້ຄໍາໝັ້ນສັນຍາວ່າ ຈະນໍາເຄື່ອງວັດຖຸດັ່ງກ່າວ ໄປແຈກຢາຍໃຫ້ຄອບຄົວທີ່ຖືກຜົນກະທົບຢ່າງທົ່ວເຖິງ ແລະ ຫວັງຢ່າງຍິ່ງວ່າ ໃນໂອກາດໜ້າຈະໄດ້ຮັບເຄື່ອງຊ່ວຍເຫຼືອຈາກພາກສ່ວນດັ່ງກ່າວ ຕື່ມອີກ.
ໂດຍ: ບຸນຈັນ ທ່າວ
ປະກາດ ຮ່ວມສ້າງຄວາມສຸກສູ່ສັງຄົມລາວ
