ພິທີໂຮມຊຸມນຸມສເຫຼີມສະຫຼອງສອງວັນປະຫວັດສາດລາວ-ຫວຽດນາມຄືວັນສ້າງຕັ້ງສາຍພົວພັນການທູນລາວ-ຫວຽດນາມຄົບຮອບ55 ປີ( 5 / 9 / 1962 - 5 /9 /2017 ) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ - ຫວຽດນາມຄົບຮອບ 40 ປີ (18/7/1977-18/7/2017) ໄດ້ຈັດຂື້ນໃນຕອນເຊົ້າຂອງວັນທີ 31 ສິງຫາ 2017 ນີ້ ຢູ່ທີ່ສະໂມສອນຫຼັກ 4 ຂອງແຂວງຈຳປາສັກ.ໂດຍການເຂົ້າຮ່ວມຂອງ ທ່ານ ດຣ ບຸນຖອງ ດີວິໄຊ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ, ທ່ານ ດາວວັນຫຽວ ຫົວໜ້າກົງສູນໄຫ່ຍຫວຽດນາມປະຈຳ 4 ແຂວງພາກໄຕ້ ທີ່ປາກເຊ ຢູ່ແຂວງຈຳປາສັກ ມີບັນດາການນຳຂອງແຂວງ, ສາມາຄົມຫວຽດນາມທີ່ມາເຮັດທຸລະກິດຢູ່ແຂວງຈຳປາສັກ,ບັນດາຫົວໜ້າ,ຮອງຫົວໜ້າພະແນກການອ້ອມຂ້າງແຂວງ,ພະນັກງານ-ລັດຖະກອນທຸກອົງການຈັດຕັ້ງເຂົ້າຮ່ວມ.
ໃນໂອກາດອັນສະຫງ່າລາສີນີ້ ທ່ານ ດຣ ບຸນຖອງ ດີວິໄຊ ເຈົ້າແຂວງໆຈຳປາສັກ ໄດ້ກ່າວປາໄສຕໍ່ພິທີ ເຊິ່ງທ່ານ ໄດ້ກ່າວວ່າ: ເມື່ອທົບທວນຄືນປະຫວັດສາດແຫ່ງການພົວພັນອັນມີມາແຕ່ຍາວນານຂອງສອງພັກສອງລັດ ແລະ ປະຊາຊົນສອງຊາດ ຍິ່ງຈົດຈຳ ແລະຮູ້ບຸນຄຸນອັນລໍ້າເລີດຂອງ ປະທານ ໂຮຈິມິນ ຜູ້ຍິ້ງໃຫ່ຍ, ປະທານໄກສອນ ພົມວິຫານ ແລະ ປະທານ ສຸພານຸວົງເຊິ່ງເປັນຜູ້ໃຫ້ກຳເນີດ ແລະ ໄດ້ເປັນຕົວແບບແຫ່ງການຖະນຸຖະໜອມເພີ່ມພູນຄູນສ້າງມິດຕະພາບອັນຍິ່ງໄຫ່ຍ ແລະ ການພົວພັນສາມະຄີພິເສດລະຫວ່າງສອງຊາດລາວ-ຫວຽດນາມຢ່າງສະເໝີຕົ້ນສະເໝີປາຍ,ຍົກໃຫ້ເຫັນເຖິງການຮ່ວມກັນຕໍ່ສູ້ໃນຂຸມຄອງດຽວກັນໃນແຕ່ລະໄລຍະຈົ່ນສາມາດຍາດໄດ້ໄຊຊະນະ ແລະ ສາມາດສະຖາປານາ ສປປລາວ ໃນປີ1975. ພາຍຫຼັງມະຫາໄຊຊະນະດັ່ງກ່າວແລ້ວ ສອງປະເທດໄດ້ເຂົ້າສູ່ສັງກາດໄໝ່ສັງກາດແຫ່ງສັນຕິພາບ,ເອກະລາດ,ເອກະພາບ ແລະ ສິດເປັນເຈົ້າຕົນເອງໃນການສ້າງສາພັດທະນາທີ່ໄປສູ່ຈຸດໝາຍທີ່ວາງໄວ້ໃນເງື່ອນໄຂແລະສະພາບແວດລ້ອມຄືແນວນັ້ນຈິ່ງເປັນເຫດກສນທີ່ສຳຄັນຄືການເຊັນສົນທິສັນຍາມິດຕະພາບແລະການຮ່ວມມືໃນວັນທີ 18 ກໍລະກົດປີ 1977ເທົ່າທຸກວັນນີ້.
ຈາກນີ້ ຜູ້ເຂົ້າຮ່ວມຍັງໄດ້ຮັບຟັງຄຳເຫັນຂອງຫົວໜ້າກົງສູນໄຫ່ຍຫວຽດນາມປະຈຳ 4 ແຂວງພາກໄຕ້ທີ່ແຂວງຈຳປາສັກ ແລະພະນັກງານອະວຸໂສບຳນານທີ່ອາດີດເຄີຍຮ່ວມການປະຕິວັດຊາດລະຫ່ວາງລາວ-ຫວຽດນາມ ອີກດ້ວຍ ແລະໃນພິທີຍັງໄດ້ຊົມການສະແດງສິນລະປະວັນະຄະດີທີ່ສະແດງໃຫ້ເຫັນຜົນສຳເລັດຢ່າງໜ້າຊື່ນຊົມໃນການຮ່ວມມືລາວ - ຫວຽດນາມຈາກອະດີດຈົນເຖິງປັດຈຸບັນອີກດ້ວຍ.
ໂດຍ: ປະພິດ ສີສົມບູນ
________
ປະກາດ ຮ່ວມສ້າງຄວາມສຸກສູ່ສັງຄົມລາວ
