ໃນໂອກາດດັ່ງກ່າວ, ທ່ານ ກິດຕິໄຊ ໄຕຣຣັດສິຣິໄຊ ອະທິການບໍດີ ມະຫາວິທະຍາໄລຂອນແກ່ນ ໄດ້ເປັນກຽດຂຶ້ນກ່າວມອບປະລິນຍາ ດຸສະດີບັນດິດກິດຕິມະສັກ ສາຂາການພົວພັນຕ່າງປະເທດໃຫ້ແກ່ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ຢ່າງສົມກຽດ, ເຊິ່ງເປັນບຸກຄົນທີ່ມີຄວາມສຳຄັນ ໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ໃນຫຼາຍລະດັບ ລະຫວ່າງ ສອງປະເທດ ລາວ-ໄທ ມາໂດຍຕະຫຼອດ. ຕະຫຼອດໄລຍະຜ່ານມາ ທ່ານ ນາຍົກລັດຖະມົນຕີ ໄດ້ປະກອບສ່ວນຊຸກຍູ້ສົ່ງເສີມ ການສ້າງເຄືອຂ່າຍຄົມມະນາຄົມ ເຊື່ຶອມໂຍງຫວຽດນາມ ແລະ ບາງກອກ; ສະໜັບສະໜູນການຮ່ວມມື ພາຍໃຕ້ກອບອາຊຽນ, ກຸ່ມລຸ່ມແມ່ນໍ້າຂອງ ແລະ ຍຸດທະສາດການຮ່ວມມື ທາງເສດຖະກິດ ແມ່ນໍ້າອິຣະວະດີ-ແມ່ນໍ້າເຈົ້າພະຍາ-ແມ່ນໍ້າຂອງ ແລະ ອື່ນໆ.
ພ້ອມດຽວກັນນັ້ນ, ທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ມາຍັງທ່ານ ອະທິການບໍດີ, ພະນັກງານຄູ-ອາຈານ ຂອງມະຫາວິທະຍາໄລຂອນແກ່ນ ທີ່ໄດ້ມອບປະລິນຍາດັ່ງກ່າວໃຫ້ ເຊິ່ງຖືເປັນກຽດຢ່າງສູງ ແລະ ເປັນການໃຫ້ກຳລັງໃຈ ເພື່ອສືບຕໍ່ປະຕິບັດໜ້າທີ່ ໃນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງານ ລະຫວ່າງ ສອງຊາດ ລາວ-ໄທ, ທັງເປັນການຊຸກຍູ້ສົ່ງເສີມການຮ່ວມມື ໃນພາກພື້ນ ແລະ ສາກົນ ກໍຄືຄອບຄົວອາຊຽນ ໃຫ້ມີຄວາມຈະເລີນຮຸ່ງເຮືອງສີວິໄລ ແລະ ເປັນພາກພື້ນທີ່ມີສັນຕິພາບ, ສະຖຽນລະພາບ ແລະ ການຮ່ວມມືພັດທະນາຕາມແຜນ ຂອງຜູ້ນຳອາຊຽນ ທີ່ໄດ້ວາງໄວ້ຮ່ວມກັນໃຫ້ເກີດຜົນເປັນຈິງ.
ແຫຼງທີ່ມາ: ຂ່າວສານປະເທດລາວ.
ຂ່າວ: ສົມຫວັງ, ພາບ: ມະຫາວິະຍາໄລຂອນແກ່ນ
ປະກາດ ຮ່ວມສ້າງຄວາມສຸກສູ່ສັງຄົມລາວ
