● ແອເອເຊຍຂະຫຍາຍໂຄງການ AirAsia Runway Ready Designer Search 2017 ຄັ້ງທີສາມ ໄປທົ່ວສິບປະເທດອາຊຽນ
● ຮອບຄັດເລືອກຈະໄດ້ຈັດຂື້ນທີ່ເມືອງຫລວງຂອງແຕ່ລະປະເທດເລີ່ມແຕ່ເດືອນເມສາ-ມິຖຸນາ
● ສອງອັນດັບທຳອິດຈາກແຕ່ລະເມືອງຈະໄດ້ເປັນຕົວແທນໃຫ້ແກ່ປະເທດຂອງຕົນ ແລະ ມີໂອກາດທີ່ຈະໄດ້ຮັບ ລາງວັນມູນຄ່າບໍ່ຕໍ່າກວ່າ 350,000 ຣິງກິດ ແລະ ປະສົບການທີ່ມີຄ່າຈາກຜູ້ຊ່ຽວຊານໃນອຸດສາຫະກຳແຟຊັນ
ເຊປັງ, 8 ກຸມພາ 2017 - ແອເອເຊຍເປີດໂຄງການ AirAsia Runway Ready Designer Search 2017 ເພື່ອມອບໂອກາດຄັ້ງຫນຶ່ງໃນຊີວິດໃຫ້ແກ່ບັນດານັກອອກແບບທົ່ວພາກພື້ນອາຊຽນທີ່ປາຖະຫນາຢາກຈະເຂົ້າຮ່ວມ, ເຊິ່ງໃນປີນີ້ ແອເອເຊຍໄດ້ຂະຫຍາຍໂຄງການດັ່ງກ່າວໄປທົ່ວສິບປະເທດອາຊຽນ.
ສຳລັບການແຂ່ງຂັນປີນີ້ຈະມີການເດີນທາງໄປຄັດເລືອກຫາຕົວແທນຢູ່ຕາມເມືອງຫລວງຂອງແຕ່ລະປະເທດ ຕະຫລອດ ໄລຍະເດືອນເມສາຫາ-ມິຖຸນາ ເພື່ອຄົ້ນຫາສອງນັກອອກແບບແຟຊັນທີ່ປາຖະຫນາຢາກຈະເປັນຕົວແທນປະເທດຂອງຕົນ ເຂົ້າຮ່ວມສະແດງຜົນງານໃນຮອບຊິງຊະນະເລີດ ເຊິ່ງຈະໄດ້ຈັດຂຶ້ນຢູ່ນະຄອນຫລວງກົວລາລຳເປີໃນເດືອນສິງຫາ.
ສຳລັບຜູ້ຊະນະເລີດຈາກໂຄງການຄົ້ນຫານັກອອກແບບໃນລະດັບພາກພື້ນຄັ້ງນີ້ຈະໄດ້ຮັບລາງວັນມູນຄ່າບໍ່ຕໍ່າກວ່າ 350,000 ຣິງກິດ, ປະກອບດ້ວຍ ໂອກາດທີ່ຈະໄດ້ໄປສະແດງຜົນງານໃນງານ KL Fashion Week Ready To Wear 2018, ເງິນລາງວັນຈຳນວນ 25,000 ຣິງກິດ ຈາກ FashionValet ເພື່ອນຳເອົາໄປຜະລິດຊຸດເສື້ອຜ້າແຟຊັນ ທີ່ຈະນຳເອົາໄປຂາຍຜ່ານທາງ FashionValet.com, ນອກນັ້ນຍັງຈະໄດ້ຮັບແຕ້ມສະສົມ AirAsia BIG Point ຈຳນວນ 150,000 ແຕ້ມ, ປີ້ໂດຍສານຈາກແອເອເຊຍ ແລະ ອື່ນໆອີກ.
ບັນດານັກອອກແບບທີ່ມີຊື່ສຽງຈາກແຕ່ລະປະເທດເຊັ່ນ ນັກອອກແບບເສື້ອຜ້າຍີ່ຫໍ້ Q Design and Play ຈາກ ປະເທດໄທ, ທ່ານ ແອນໂທນີ ຣາມີເຣດຊ໌ (Anthony Ramirez) ຈາກປະເທດຟິລິບປິນ ແລະ ທ່ານ ເມລ ອາຮີອາຣ໌ (Mel Ahyar) ຈາກປະເທດອິນໂດເນເຊຍ, ຈະໄດ້ເປັນສ່ວນຫນຶ່ງຂອງຄະນະກຳມະການຕັດສິນໃນຮອບຄັດເລືອກຢູ່ ປະເທດນັ້ນໆ. ສຳລັບທ່ານ ແອນດຣູ ຕັນ (Andrew Tan), ຜູ້ກໍ່ຕັ້ງ KL Fashion Week Ready To Wear ແລະ ທ່ານນາງ ວິວີ່ ຢູໂຊບຟ໌ (Vivy Yusof), ຜູ້ຮ່ວມກໍ່ຕັ້ງ FashionValet ຈະຮັບຫນ້າທີ່ເປັນຜູ້ຕັດສິນຖາວອນໃນແຕ່ລະຮອບຄັດເລືອກທົ່ວປະເທດອາຊຽນ.
ນອກຈາກນີ້, ທ່ານນາງ ອາເລຍ ບາສະຕາມຳ (Alia Bastamam), ນັກອອກແບບແຟຊັ່ນຊື່ດັ່ງ ແລະ ທ່ານນາງ ຢາງ ເມ ລິງ (Yang Mei Ling), ບັນນາທິການນິຕະຍະສານ FEMALE ຂອງປະເທດມາເລເຊຍ ກໍ່ຈະຮ່ວມເປັນສ່ວນຫນຶ່ງຂອງຄະນະກຳມະການຕັດສິນໃນຮອບຄັດເລືອກຢູ່ປະເທດມາເລເຊຍອີກດ້ວຍ.
ທ່ານນາງ ໄອຣີນ ໂອມາຣ໌ (Aireen Omar), ປະທານເຈົ້າຫນ້າທີ່ບໍລິຫານສາຍການບິນແອເອເຊຍເບີຣ໌ຫັດ ໄດ້ກ່າວວ່າ “ອາຊຽນແມ່ນພາກພື້ນທີ່ເຕັມໄປດ້ວຍວັດທະນະທຳທີ່ອຸດົມສົມບູນ, ເຊິ່ງໄດ້ສ້າງແຮງບັນດານໃຈໃຫ້ແກ່ນັກອອກແບບແຟຊັນທົ່ວໂລກ. ແຕ່ທີ່ສຳຄັນທີ່ສຸດ, ພາກພື້ນອາຊຽນຍັງມີກຸ່ມຄົນທີ່ມີພອນສະຫວັນເປັນຢ່າງຍິ່ງ, ເຊິ່ງພວກເຮົາຫວັງທີ່ຈະຊ່ວຍນຳເອົາພວກເຂົາໄປສູ່ແຖວຫນ້າຂອງອຸດສາຫະກຳແຟຊັນຜ່ານໂຄງການຄົ້ນຫານັກອອກແບບໃນລະດັບພາກພື້ນຄັ້ງນີ້. ພວກເຮົາພາກພູມໃຈຫລາຍທີ່ຈະຂໍປະກາດວ່າພວກເຮົາໄດ້ຂະຫຍາຍໂຄງການ AirAsia Runway Ready Designer Search ໄປທົ່ວສິບປະເທດອາຊຽນ ແລະ ພວກເຮົາບໍ່ສາມາດທີ່ຈະລໍຖ້າເບິ່ງໄດ້ວ່າການແຂ່ງຂັນໃນປີນີ້ຈະມີຫຍັງແນ່.”
ທ່ານ ແອນດຣູ ຕັນ, ຜູ້ກໍ່ຕັ້ງ Kuala Lumpur Fashion Week Ready To Wear ໄດ້ກ່າວວ່າ “ພວກເຮົາຍິນດີເປັນຢ່າງຍິ່ງທີ່ຈະໄດ້ຮ່ວມງານກັບແອເອເຊຍອີກຄັ້ງຫນຶ່ງໃນໂຄງການ AirAsia Runway Ready Designer Search 2017. ພະລະກຳລັງ ແລະ ການສ້າງສັນຜົນງານທີ່ເຫັນໄດ້ຈາກປີທີ່ຜ່ານມາແມ່ນດີຫລາຍ, ສະນັ້ນ ພວກເຮົາຈິ່ງມີຄວາມກະຕືລືລົ້ນຫລາຍກວ່າເກົ່າທີ່ຈະໄດ້ເຫັນຜົນງານໃນປີນີ້ ເພາະວ່າໂຄງການດັ່ງກ່າວໄດ້ຂະຫຍາຍໄປສູ່ອີກຫ້າປະເທດໃນອາຊຽນ. ບໍ່ສົງໄສເລີຍວ່າໂຄງການ AirAsia Runway Ready Designer Search 2017 ແມ່ນຫນຶ່ງໃນກິດຈະກຳຄົ້ນຫານັກອອກແບບທີ່ມີຊື່ສຽງຫລາຍທີ່ສຸດໃນພາກພື້ນອາຊຽນ. ເນື່ອງຈາກຜູ້ທີ່ຜ່ານເຂົ້າຮອບສຸດທ້າຍທັງຫມົດຈະໄດ້ໃກ້ຊິດກັບອຸດສາຫະກຳແຟຊັນ ແລະ ສື່ມວນຊົນຢ່າງມະຫາສານ, ມັນຈະຊ່ວຍເຮັດໃຫ້ຊ່ອງຫວ່າງລະຫວ່າງຄວາມຝັນ ແລະ ຄວາມເປັນຈິງສຳລັບຜູ້ທີ່ມີຈຸດປະສົງຢາກຈະມີຍີ່ຫໍ້ເປັນຂອງຕົວເອງ ວັນໃດວັນຫນຶ່ງນັ້ນແຄບລົງ. ພວກເຮົາບໍ່ສາມາດທີ່ຈະລໍຖ້າເບິ່ງຜູ້ທີ່ຜ່ານເຂົ້າຮອບສຸດທ້າຍທຸກຄົນສະແດງຜົນງານຂອງ ຕົນຢູ່ເທິງເວທີໃນເດືອນສິງຫາທີ່ງານ KLFW RTW 2017.”
ໂຄງການຄົ້ນຫານັກອອກແບບຄັ້ງນີ້ແມ່ນເປີດໂອກາດໃຫ້ແກ່ບຸກຄົນທຸກສັນຊາດ, ອາຍຸບໍ່ເກີນ 30 ປີ, ທີ່ອາໄສຢູ່ປະເທດໃດຫນຶ່ງໃນສິບປະເທດອາຊຽນຮ່ວມສະຫມັກ. ສຳລັບຜູ້ທີ່ສົນໃຈຢາກຈະສະຫມັກຈະຕ້ອງສົ່ງ ຮ່າງຮູບແຕ້ມເສື້ອຜ້າ ແມ່ຍິງທີ່ພ້ອມຈະສວມໃສ່ (ready-to-wear) ເຊິ່ງໄດ້ຮັບແຮງບັນດານໃຈຈາກປະເທດໃນພາກພື້ນອາຊຽນ ຈຳນວນ 3 ແບບ ພ້ອມກັບແບບຟອມລົງທະບຽນສະບັບສົມບູນ ເຊິ່ງສາມາດຫາໄດ້ທາງເວັບໄຊທ໌ Klfashionweek.com. ຜູ້ເຂົ້າຮ່ວມໂຄງການສາມາດຂໍຂໍ້ມູນເພີ່ມເຕີມຜ່ານທາງອີເມວ aarrds2017@klfashionweek.com.
ແອເອເຊຍຍັງເປັນຄູ່ຮ່ວມຂອງການເດີນທາງທີ່ເປັນທີ່ນິຍົມຂອງ Kuala Lumpur Fashion Week Ready To Wear 2017 ແລະ ຈະນຳເອົານັກອອກແບບແຟຊັນຈາກປະເທດທີ່ຢູ່ໃນເຄືອຂ່າຍເສັ້ນທາງ ການບິນຂອງກຸ່ມບໍລິສັດແອເອເຊຍເຊັ່ນ ອິນເດຍ, ຈີນ, ອົດສະຕຣາລີ, ຍີ່ປຸ່ນ ແລະ ເກົາຫລີໃຕ້ ເຂົ້າມາຮ່ວມໃນເວທີ ງານ KL Fashion Week Ready To Wear ທີ່ຈະໄດ້ຈັດຂື້ນໃນລະຫວ່າງວັນທີ 16-20 ສິງຫາ 2017.
ທ່ານສາມາດຕິດຕາມຜົນງານຂອງຜູ້ເຂົ້າຮ່ວມທັງຫມົດໃນແຕ່ລະຕອນຜ່ານທາງຊ່ອງ YouTube ຂອງແອເອເຊຍທີ່ youtube.com/user/AirAsia ຫລື ຕິດຕາມໄດ້ທີ່ #AirAsiaRunway ຕາມຊ່ອງທາງສື່ສັງຄົມອອນໄລນ໌ຕ່າງໆເຊັ່ນ Facebook (facebook.com/AirAsia) ແລະ Twitter (twitter.com/AirAsia).
ຕາຕະລາງຮອບຄັດເລືອກຂອງໂຄງການ AirAsia Runway Ready Designer Search 2017
ກ່ຽວກັບກຸ່ມບໍລິສັດແອເອເຊຍ
ແອເອເຊຍແມ່ນສາຍການບິນລາຄາປະຢັດຊັ້ນນຳທີ່ໃຫຍ່ທີ່ສຸດໃນອາຊີ, ມີເຄືອຄ່າຍການບິນທີ່ກວ້າງຂວາງທີ່ສຸດ ຈຳນວນຫລາຍກວ່າ 120 ຈຸດຫມາຍປາຍທາງ. ຕະຫລອດໄລຍະເວລາ 15 ປີຂອງການດຳເນີນທຸລະກິດ, ແອເອເຊຍ ໄດ້ໃຫ້ບໍລິການຜູ້ໂດຍສານຈຳນວນ 330 ລ້ານກວ່າຄົນ ແລະ ຂະຫຍາຍຝູງເຮືອບິນຈາກພຽງແຕ່ 2 ລໍາ ມາເປັນ 200 ກວ່າລຳ. ແອເອເຊຍພາກພູມໃຈທີ່ເປັນສາຍການບິນອັນແທ້ຈິງຂອງອາຊຽນ (ສະມາຄົມປະຊາຊາດອາຊີເວັນອອກສຽງໃຕ້) ໂດຍການດໍາເນີນທຸລະກິດຢູ່ປະເທດມາເລເຊຍ, ອິນໂດເນເຊຍ, ໄທ, ຟີລິບປິນ ແລະ ອິນເດຍ, ໃຫ້ບໍລິການທົ່ວອາຊີ, ອົດສະຕຣາລີ ແລະ ນິວຊີແລນ, ຕາເວັນອອກກາງ ແລະ ອາຟຣິກກາ. ແອເອເຊຍໄດ້ຮັບລາງວັນສາຍການບິນ ລາຄາປະຢັດທີ່ດີທີ່ສຸດໃນໂລກຈາກງານປະຈຳປີ Skytrax World Airline Awards ເປັນເວລາ 8 ປີຊ້ອນ ຕັ້ງແຕ່ປີ 2009-2016. ນອກຈາກນີ້, ແອເອເຊຍຍັງເປັນສາຍການບິນທໍາອິດຂອງໂລກທີ່ຮ່ວມມືກັບອົງການຕຳຫລວດສາກົນ (INTERPOL) ໃນການນຳເອົາລະບົບ I-Checkit ມາໃຊ້ກວດສອບຫນັງສືເດີນທາງຂອງຜູ້ໂດຍສານ, ໂດຍລະບົບນີ້ ຈະກວດສອບຂໍ້ມູນອ້າງອີງກັບຖານຂໍ້ມູນເອກະສານການເດີນທາງທີ່ຖືກລັກຫລືສູນຫາຍ (Stolen and Lost Travel Documents ຫລື SLTD) ຈາກອົງການຕໍາຫຼວດທົ່ວໂລກ.
ສໍາລັບຂໍ້ມູນເພີ່ມຕື່ມທາງດ້ານສື່ຂ່າວສານ, ກະລຸນາຕິດຕໍ່:
Qastury Jawawi
ພະແນກການສື່ສານ
ມືຖື: +6019 609 8893
ອີເມວ: qasturyjawawi@airasia.com
