ປະຫວັດ ພະເທບວິທະຍາຄົມ ຫຼື ຫຼວງພໍ່ຄູນ ປະຣິສຸດໂທ ອາຈານ ແຫ່ງອີສານ, ເຈົ້າອາວາດວັດ ບ້ານໄຮ່, ອຳເພີ ດ່ານຂຸນທົດ, ຈັງຫວັດນະຄອນລາດຊະສີມາ. ເປັນພະສົງທີ່ຊາວໄທ ແລະ ຊາວລາວຫຼາຍຄົນ ໄດ້ໃຫ້ຄວາມເຄົາລົບ ແລະ ສັດທາເປັນທີ່ສຸດ. ຖ້າເວົ້າເຖິງເອກະລັກຂອງ ຫຼວງພໍ່ຄູນ ທີ່ໂດດເດັນ ແມ່ນ ການນັ່ງຢ່ອງຢໍ້ ເວົ້າກູມຶງ. ດຳລັງຊີວິດແບບສັນໂດດ ຈົນກາຍເປັນພາບທີ່ຫຼາຍຄົນຄຸ້ນຕາກັນດີ.
ຫຼວງພໍ່ຄູນ ນຳພະທຳຄຳສອນ ຂອງພະສຳມາສຳພຸດທະເຈົ້າ ມາກ່າວເປັນຄະຕິທຳຄຳສອນສັ້ນໆ ແບບກົງໄປກົງມາ, ເຂົ້າໃຈງ່າຍ ແຕ່ເລິກເຊິ່ງ ແລະ ເປັນອຳມະຕະ ງ່າຍຕໍ່ການປະຕິບັດ, ຄວາມເມດຕາອາລີ ຖືເປັນທີ່ຕັ້ງ ຂອງຫຼັກຄຸນນະທຳ ທີ່ເຮັດໃຫ້ຫຼວງພໍ່ຄູນ ໄດ້ຮັບສາຍານຳວ່າ: ເທບພະເຈົ້າ ແຫ່ງດ່ານຂຸນທົດ.
ຫຼວງພໍ່ຄູນ ເກີດໃນຕະກຸນ ຊັດຕະພອນກຣັງ ໃນວັນພະຫັດ ທີ 4 ຕຸລາ ພສ 2466 ທີ່ບ້ານໄຮ່, ມ 6 ຕຳບົນ ກຸດພິມານ, ອຳເພີດ່ານຂຸນທົດ, ຈັ່ງວັດນະຄອນລາດຊະສີມາ. ບິດາຊື່ ທ້າວບຸນ ແລະ ມານດາຊື່ ນາງທອງຂາວ ຊັດຕະພອນກຣັງ. ມີພີ່ນ້ອງຮ່ວມທ້ອງດຽວກັນ 3 ຄົນ. ຄອບຄົວປະກອບອາຊີບ ເປັນຊາວນາ ໃນເຂດຊົນນະບົດ ທີ່ຫ່າງໄກຈ່າງຕົວເມືອງ.
ໃນຕອນເຍົາໄວ, ທ່ານຕ້ອງໄດ້ສູນເສຍ ໂຍມບິດາມານດາ, ຂະນະທີ່ລູກທັງສາມ ຍັງເປັນເດັກນ້ອຍ ເຊິ່ງໄດ້ຮັບການອຸປະກາລະລ້ຽງດູ ໂດຍ ນ້າສາວ. ເມື່ອອາຍຸ 6-7 ປີ, ທ້າວຄູນ ໄດ້ເຂົ້າຮຽນໜັງສື ກັບພະອາຈານ ສາຍ ແລະ ພະອາຈານ ຫົນ ໃນສາຍວິຊາ ພາສາໄທ ແລະ ພາສາຂອບ.ພະອາຈານຍັງມີເມດຕາອົບຮົມບົ່ມສອນ ວິທະຍາຄົມ ເພື່ອປ້ອງກັນອັນຕະລາຍຕ່າງໆ ໃຫ້ກັບ ທ້າວຄູນອີກ.
ຈົນຮອດອາຍຸ 21 ປິ, ຈິ່ງໄດ້ເຂົ້າພິທີອຸປະສົມບົດ ທີ່ ພັດທະສີມາ, ວັດທະນົນຫັກໃຫຍ່, ຕຳບົນກຸດພິມານ, ອຳເພີດ່ານຂຸນທົດ, ຈັ່ງຫວັດນະຄອນລາດຊະສີມາ ໃນວັນສຸກ ທີ 5 ພຶດສະພາ 2487 ແລະ ໄດ້ຮັບສາຍະນາມວ່າ ປະຣິສຸດໂທ
ຫຼວງພໍ່ຄູນ ຢູ່ຮັບໃຊ້ຫຼວງພໍ່ແດງ ມາດົນນານພໍ່ສົມຄວນ, ຫຼວງພໍ່ແດງຈິ່ງໄດ້ພາຫຼວງພໍ່ຄູນໄປຝາກຕົວເປັນສິດຫຼວງພໍ່ ຄົງ ພຸດສະໂຣ ເຊື່ງເປັນ ສະຫະທຳມິກກັນ. ເວລາຜ່ານໄປ ຈົນກະທັ້ງຫຼວງພໍ່ຮູ້ວ່າ ລູກສິດມີຄວາມຮອບຮູ້ຊຳນານການປະຕິບັດດີແ້ວ ຈິ່ງແນະນຳໃຫ້ອອກທຸດົງ ຈາຣຶກ ໄປຕາມປ່າຕາມເຂົາ ເພື່ອປະຕິບັດທຳເບື່ອງສູງຕໍ່ໄປ.
ໃນເບື້ອງຕົ້ນ, ຫຼວງພໍ່ຄູນທ່ອງທຸດົງຈາຣິກ ຢູ່ເຂດຈັງຫວັດນະຄອນລາດຊະສີມາ ຈາກນັ້ນ ກໍ່ອອກໄປໄກຮອດປະເທດລາວ ແລະ ປະເທດກຳປູເຈຍ ໂດຍເຂົ້າໄປເຖິງປ່າເລີກດົງໜາ ເພື່ອທຳຄວາມພຽນ ໃຫ້ເກີດສະຕິປັນຍາ ເພື່ອໃຫ້ລຸດພົ້ນຈາກກິເລດ ຕັນຫາ ແລະ ອຸປະທານທັງປວງ.
ຫຼັງຈາກທີ່ໄດ້ມີການພິຈາລນາເຫັນສົມຄວນ ແກ່ການແລ້ວ, ຫຼວງພໍ່ຄູນ ຈິ່ງອອກເດີນທາງຈາກປະເທດຂະເໝນກັບສູ່ປະເທດໄທ, ເດີນຂ້ານເຂດດ່ານຈັ່ງຫວັດສຸລິນ ສູ່ຈັ່ງຫວັດນະຄອນລາດຊະສີມາ ເພື່ອກັບບ້ານເກີດ.ຈາກນັ້ນ, ກໍ່ໄດ້ດຳເນີນກິດ ການກໍ່ສ້າງວັດບ້ານໄຮ່ ເພື່ອ ໃຫ້ເປັນສະຖານທີ່ ສັກກະລະບູຊາ ຂອງພຸດທະສາສະໜາ, ພ້ອມທັງໄດ້ສ້າງໂຮງຮຽນໄວ້ເພື່ອເດັກນ້ອຍບ້ານໄຮ່ນຳອີກ, ຖືເປັນພະນັກພັດທະນາ ທີ່ມີສາທຸຊົນ ໃຫ້ຄວາມສັດທາຢ່າງສູງ.
ໃນດ້ານການສ້າງວັດຖຸມົງຄຸນ, ຫຼວງພໍ່ຄູນຈັດສ້າງວັດຖຸມົງຄຸນມາຕັ້ງແຕ່ບວດແລ້ວ 7 ພັນສາ, ເລີ່ມເຮັດວັດຖຸມົງຄຸນ ເປັນຕະກຣຸດໂທນ, ຕະກຣຸດທອງຄຳຝັງທີ່ໃຕ້ແຂນ ທີ່ວັດບ້ານໄຮ່ ໃນໄລຍະປີ ພສ 2493.
ການປຸກເສກວັດຖຸມົງຄຸນ ຂອງຫຼວງພໍ່ຄູນ ໃຊ້ຄາຖາວ່າ ມະອະອຸ ນະມະພະທະ ນະໂມພຸດທະຍາ ພຸດໂທ ຍານະ ຫຼວງພໍ່ຄູນໃຊ້ເວລາສັ້ນໆ ໃນການປຸກເສກແຕ່ລະຄັ້ງ.
ທ່ານເຄີຍກ່າວວ່າ ເມື່ອຈະປຸກເສກວັດຖຸໃດ ໃຈຕ້ອງເປັນສະມາທິ ເມື່ອໃນມີສະມາທິ ເສກສິ່ງໃດກໍ່ມີມົນຂັງ. ແຕ່ຫຼວງພໍ່ຄູນກໍ່ກ່າວຍ້ຳວ່າ: ເມື່ອມີພະເຄື່ອງຂອງກູຕິດຕົວ ໃຫ້ພາວະນາ ພຸດໂທ ທຳຈິດໃຫ້ເປັນສະມາທິແນ້ວແນ່, ລະເວັ້ນຖ້ອຍຄຳຍາບຄາຍ ກ່າວດ່າພໍ່ແມ່ຂອງຕົນ ແລະ ພໍ່ແມ່ຄົນອື່ນ, ຢ່າຜິດສາມີ ແລະ ພັນລະຍາຜູ້ອື່ນ ແລະ ໃຫ້ສູດມົນກ່ອນເຂົ້ານອນທຸກຄືນ ບໍ່ວ່າຈະຢູ່ແຫ່ງໃດ.
ຫຼວງພໍ່ຄູນ ໄດ້ລະສັງຂານ ມໍລະນະພາບ ໃນເວລາ 11:45 ນາທີ ວັນເສົາ ທີ 16 ພຶດສະພາ 2015. ລວມອາຍຸໄດ້ 92 ປີ 72 ພັນສາ. ຖືເປັນການສູນເສຍ ພະສົງອົງສຳຄັນຂອງຊາວໄທ ກໍ່ຄືຊາວພຸດທີ່ໃຫ້ຄວາມເຄົາລົບນັບຖື.
ປະຫວັດຈາກ: Khaosod.co.th
ແປໂດຍ: ທີມງານປະກາດ
