ສະຫວັນນະເຂດ ສະເຫຼີມສະຫຼອງວັນບໍລິຈາກເລືອດໂລກ ລະດົມເລືອດໄດ້ 150 ຖົງ

ສະຫວັນນະເຂດ ສະເຫຼີມສະຫຼອງວັນບໍລິຈາກເລືອດໂລກ

ໃນຕອນເຊົ້າວັນທີ 14 ມີຖຸນາ 2019 ຢູ່ທີ່ເດີນກິລາຫຼັກ 4 ອົງການກາແດງສະຫວັນນະເຂດ ຮ່ວມກັບຊາວໜຸ່ມແຂວງໄດ້ຈັດກິດຈະກຳບໍລິຈາກເລືອດ ເພື່ອເປັນການສະເຫຼີມສະຫຼອງ ວັນທີ 14 ມີຖຸນາ ວັນບໍລິຈາກເລືອດໂລກ ພາຍໃຕ້ຄຳຂັວນ ເລືອດປອດໄພ ເພື່ອໝົດທຸກຄົນ ໂດຍການເປັນປະທານຂອງທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ມີບັນດາຮາກຖານຊາວໜຸ່ມ ແລະ ສະມາຊິກຊາວໜຸ່ມອ້ອມຂ້າງແຂວງເຂົ້າຮ່ວມ.

ໃນພິທີທ່ານ ຄຳພູນ ຕຸໄພທູນ ຮອງເຈົ້າແຂວງ ໄດ້ກ່າວມີຄຳເຫັນວ່າ: ເພື່ອໃຫ້ເຫັນເຖິງຄວາມຈຳເປັນຂອງເລືອດທີ່ປອດໄພ ແລະ ໃຫ້ຜູ້ບໍລິຈາກເລືອດເຂົ້າໃຈເຖິງຂະບວນການ ເຂົ້າໃຈເຖິງດ້ານສຸຂະພາບຂອງຜູ້ໃຫ້ ແລະ ຜູ້ຮັບ ແລະ ແນວຄວາມຄິດຂອງວັນບໍລິຈາກເລືອດໂລກປີນີ້ ແມ່ນມຸ່ງເນັ້ນເຖິງຜູ້ຄົນໃນທົ່ວໂລກໄດ້ເລີ່ມຕົ້ນເປັນຜູ້ບໍລິຈາກເລືອດ ແລະ ເປັນຜູ້ບໍລິຈາກເລືອດຢ່າງເປັນປະຈຳເຊິ່ງຄາດໝາຍລວມຂອງການບໍລິຈາກເລືອດປີ 2019 ທົ່ວປະເທດຕ້ອງບັນລຸໃຫ້ໄດ້ 55.000 ຖົງ ທັງນີ້ກໍ່ເພື່ອສ້າງຄວາມເປັນນ້ຳໜຶ່ງໃຈດຽວກັນໃນການບໍລິຈາກເລືອດ ສ້າງຄຸນຄ່າຂອງການບໍລິຈາກເລືອດ ແລະ ໃຫ້ເລືອດດ້ວຍຄວາມບໍລິສຸດໃຈ, ຄວາມເຫັນອົກເຫັນໃຈ ຄວາມມີນ້ຳໃຈຕໍ່ກັນ ຊຶ່ງກໍ່ໝາຍເຖິງການບໍລິຈາກເລືອດດ້ວຍຄວາມຕື່ນຕົວສະໝັກໃຈບໍຮຽກຮ້ອງສິ່ງຕອບແທນ ທັງເປັນການໃຫ້ປະຊາຊົນຫັນມາຊ່ວຍເຫຼືອເຊິ່ງກັນ ແລະ ກັນໃຫ້ນັບມື້ຫຼາຍຂຶ້ນເລື້ອຍໆ ນອກຈາກນັ້ນກໍ່ສືບຕໍ່ປະຕິບັດແຜນການວຽກງານເລືອດໃຫ້ບັນລຸຄາດໝາຍ 60.000 ຖົງໃນປີ 2020 ແລະ ການບໍລິຈາກເລືອດແບບສະໝັກໃຈບໍຮຽກຮ້ອງສິ່ງຕອບແທນໃຫ້ໄດ້ 100%

ສຳລັບຄາດໝາຍຂອງການບໍລິຈາກເລືອດໃນການສະເຫຼີມສະຫຼອງວັນຜູ້ບໍລິຈາກເລືອດຢູ່ແຂວງສະຫວັນນະເຂດຄັ້ງນີ້ແມ່ນໃຫ້ໄດ້ 150 ຖົງ.


_______
ປະກາດ Pakaad: ຮຽນຮູ້, ແບ່ງປັນ, ສ້າງສັນສັງຄົມ
ຢ່າລືມກົດຕິດຕາມແຟນເພຈ ປະກາດ Pakaad ເພື່ອໄດ້ຮັບຂ່າວສານ ແລະ ສາລະໜ້າຮູ້

ຫາກທ່ານພົບເຫັນຂໍ້ມູນຂ່າວບໍ່ຖືກຕ້ອງ ຫຼື ທ່ານຕ້ອງການສົ່ງຂ່າວຫາທີມງານປະກາດ
ສາມາດສົ່ງໄປທາງຂໍ້ຄວາມ ໄປທີ່ m.me/Pakaad

ພິເສດ: ເປັນກໍາລັງໃຈໃຫ້ທີມງານພວກເຮົາ ພຽງແຕ່ທ່ານກົດອ່ານໂຄສະນາ ທີ່ປະກົດຢູ່ດ້ານລຸ່ມ