ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຈໍາປາສັກ ຮ່ວມກັບສະມາຄົມໂຮງແຮມ,ເຮືອນພັກ,ຮ້ານອາຫານ ໄດ້ຈັດກິດຈະກໍາ ອະນຸລັກເມືອງສະອາດສີຂຽວພາກໃຕ້ລາວ ໃນຕອນບ່າຍວັນທີ 14 ມິຖຸນາ 2020 ຢູ່ທີ່ສະຖານທີ່ທ່ອງທ່ຽວພູສ່າເຫຼົ້າ ເມືອງໂພນທອງ ແຂວງຈໍາປາສັກ
ໃຫ້ກຽດເຂົ້າຮ່ວມຂອງທ່ານ ສຸລິນ ເພັດທານີ ຮອງຫົວໜ້າພະແນກ ຖວທ ແຂວງຈໍາປາສັກ, ທ່ານ ທຸຍ ເພັດສະຫວັນ ປະທານສະມາຄົມໂຮງແຮມ ເຮືອນພັກ ແລະ ຮ້ານອາຫານ, ມີພະແນກການ, ຂະແໜງການກ່ຽວຂ້ອງ, ບັນດາທຸລະກິດການທ່ອງທ່ຽວ ພະນັກງານ,ນັກຮຽນນັກສາ ຕະຫຼອດຮອດປະຊາຊົນເຂົ້າຮ່ວມ.
ພາຍໃນກິດຈະກໍາຄັ້ງນີ້ ຄະນະຮັບຜິດຊອບໄດ້ເຜີຍແຜ່ໃຫ້ຜູ້ທີ່ເຂົ້າຮ່ວມໄດ້ຮັບຮູ້ກ່ຽວກັບຈຸດປະສົງ ແລະ ຄວາມເປັນມາຂອງງານອະນຸລັກ #ເມືອງສະອາດສີຂຽວພາກໃຕ້ລາວ, ການຈັດຕັ້ງປະຕິບັດກິດຈະກໍາການຫຼຸດຜ່ອນການນໍາໃຊ້ປຣາສະຕິກຢູ່ພາກໍໃຕ້ລາວ, ເຄື່ອງໝາຍກາໂລໂກ້ການທ່ອງທ່ຽວ ພາກໃຕ້ລາວ, ສະພາບການກໍາຈັດຂີ້ເຫຍື້ອຢູ່ແຂວງຈໍາປາສັກ ແລະ ສິ່ງທ້າທາຍ, ຜົນກະທົບຈາກຂີ້ເຫຍື້ອຕໍ່ມະນຸດ ແລະ ສິ່ງແວດລ້ອມ,
ພ້ອມນີ້ກໍມີກິດຈະກໍາຖາມ-ຕອບ, ຫຼິ້ນເກມທີ່ຕິດພັນກັບການຮັກສາສິ່ງແວດລ້ອມ ແລະທີ່ສໍາຄັນຜູ້ເຂົ້າຮ່ວມນັບແຕ່ພະນັກງານ,ນັກຮຽນນັກສຶກສາ ຕະຫຼອດຮອດປະຊາຊົນສາຂາອາຊີບຕ່າງໆກໍໄດ້ເດີນຂະບວນເກັບຂີ້ເຫຍື່ອ,ອະນາໄມຕາມເສັ້ນທາງ ແລະບໍລິເວນຕ່າງໆໃນຂອບເຂດພູສ່າເຫຼົ້າຢ່າງເປັນຂະບວນຟົດຟື້ນ ເຊິ່ງເຮັດໃຫ້ສະຖານທີ່ພູສ່າເຫຼົ້າມີຄວາມສະອາດຈົບງາມ ປາສະຈາກຂີ້ເຫຍື່ອ ແລະສີ່ງເສດເຫຼືອ.
ເກດສະໜາ ແກ້ວສຸວັນນະແສງ
