ບໍລິສັດອາລິອັນສ໌ ປະກັນໄພລາວ ມອບເງິນໃຫ້ຜູ້ປະສົບເຫດອັກຄີໄພຕະຫຼາດຊັ່ງຈຽງ ຈາກເຫດ ອັກຄີໄພຕະຫຼາດຊັ່ງຈຽງໃນວັນທີ 14 ກໍລະກົດ 2017 ທີ່ຜ່ານມາໄດ້ສ້າງຄວາມ ເສຍຫາຍຢ່າງໃຫຍ່ຫຼວງ ໃຫ້ກັບບັນດາຊາວຄ້າຂາຍພາຍໃນຕະຫຼາດຈຳນວນ 300 ກວ່າຮ້ານຄ້າ.
ໃນນັ້ນມີຈຳນວນ 28 ຮ້ານຄ້າທີ່ໄດ້ເຮັດປະກັນໄພທຸລະກິດຂະໜາດນ້ອຍໄວ້ກັບ ບໍລິສັດ ອາລິອັນສ໌ ປະກັນໄພລາວ (AGL) ແລະໄດ້ຮັບເງິນທົດແທນຄວາມເສຍຫາຍເປັນຈໍານວນເງິນ 10,7ຕື້ກວ່າ ກີບ (ສິບຕື້ເຈັດຮ້ອຍສາມສິບແປດລ້ານກີບ).
ເພື່ອເປັນການທົດແທນຄືນຄວາມເສຍຫາຍດັ່ງກ່າວ ບໍລິສັດອາລິອັນສ໌ ປະກັນໄພລາວ ຈິ່ງໄດ້ຮີບດ່ວນ ກວດກາເອກະສານສັນຍາ ແລະປະເມີນຄວາມເສຍຫາຍ ທັງໄດ້ຈັດພິທີມອບເງິນ ສົດທົດແທນ ປະກັນໄພ ຂຶ້ນໃນວັນທີ 8 ກັນຍາ ທີ່ສຳນັກງານໃຫຍ່ ບໍລິສັດອາລິອັນສ໌ ປະກັນໄພລາວ ກ່າວມອບ ໂດຍທ່ານ ກີ ອາໂປວີ ຜູ້ອຳນວຍການໃຫຍ່ ບໍລິສັດອາລິອັນສ໌ ປະກັນໄພລາວ ແລະຮັບໂດຍ ຊາວຄ້າ ຂາຍທັງໝົດ 28 ຮ້ານພ້ອມທັງເຂົ້າຮ່ວມເປັນສັກຂີພິຍານໂດຍສື່ມວນຊົນຫຼາຍຂະແໜງການ.
ສູນການຄ້າສາກົນ ຊັ່ງຈຽງແມ່ນໄດ້ຮັບການລົງທຶນຈາກ ນັກລົງທຶນ ສປ ຈີນ ເຮັດສັນຍາເຊົ່າເນື້ອທີ່ດິນ ທັງໜົດ 17 ເຮັກຕາ ກັບ ກະຊວງປ້ອງກັນປະເທດ ເປັນເວລາ 50 ປີ ໂດຍໄດ້ຮັບອະນຸຍາດ ຈາກກະຊວງ ແຜນການ ແລະ ການລົງທຶນ ໃນປີ 2006 ແລະ ໄດ້ດໍາເນີນທຸລະກິດຈາກກະຊວງອຸດສາຫະກໍາ ແລະ ການຄ້າ ໃນປີ 2009 ເນື້ອທີ່ສູນການຄ້າທີ່ຖືກໄຟໄໜ້ 15.600 ຕາເມັດ ມີຫ້ອງຂາຍເຄື່ອງ 430 ຫ້ອງ ລວມທັງຂອງຄົນລາວ ແລະ ຈີນ.
ເຈົ້າໜ້າທີ່ ປກສ ນະຄອນຫລວງວຽງຈັນ ໃຫ້ຮູ້ວ່າ: ອີງໃສ່ພະຍານ, ກ້ອງວົງຈອນປິດ ແລະ ການລົງເກັບກຳຂໍ້ມູນເປັນເວລາກວ່າ 1 ເດືອນ, ເຈົ້າໜ້າທີ່ສາມາດສະຫລຸບໄດ້ວ່າ: ໄຟໄໝ້ສູນການຄ້າດັ່ງກ່າວແມ່ນຍ້ອນໄຟຟ້າລັດວົງຈອນ,
ຊຶ່ງສາມາດສັງເກດເຫັນຈຸດເກີດເຫດແມ່ນຢູ່ຫລັງຮ້ານຂາຍເຄື່ອງສຽງ ໜ້າທາງເຂົ້າຊ້າຍມື ແລະ ບວກໃສ່ກັບລະບົບໄຟຟ້າຂອງສູນການຄ້າແມ່ນເກົ່າເຮັດໃຫ້ມີໄຟຊ໋ອດ ແລະ ເກີດໄຟລຸກໄໝ້ຢ່າງໄວວາ.
________
ປະກາດ ຮ່ວມສ້າງຄວາມສຸກສູ່ສັງຄົມລາວ
