ລັດຖະບານຍີ່ປຸ່ນ ໄດ້ໃຫ້ການຊ່ວຍເຫລືອລ້າ ໃນໄລຍະສອງ ມູນຄ່າປະມານ 592.000 ໂດລາສະຫະລັດ ໃນໂຄງການສົ່ງເສີມການນຳໃຊ້ເຄື່ອງຈັກ ທຳລາຍລະເບີດລູກຫວ່ານ ທີ່ແຂວງຊຽງຂວາງ ເພື່ອຮັບ ປະກັນ ຄວາມປອດໄພໃຫ້ແກ່ສະພາບແວດລ້ອມ, ການດຳລົງຊີວິດ ແລະ ການພັດທະນາທ້ອງຖິ່ນ ໃນແຂວງຊຽງຂວາງ.
ພິທີເຊັນສັນຍາໂຄງການຊ່ວຍເຫລືອລ້າ ຈາກອົງການ JMAS ໃຫ້ມອບແກ່ອົງການຈັດຕັ້ງ ບໍ່ຂຶ້ນກັບ ລັດຖະບານ ໂຄງການນຳໃຊ້ເຄື່ອງຈັກ ທຳລາຍລະເບີດລູກຫວ່ານ ທີ່ແຂວງຊຽງຂວາງ ຈັດຂຶ້ນ ໃນວັນທີ 15 ກັນຍາ 2017 ທີ່ສະຖານທູດຍີ່ປຸ່ນ ລະຫວ່າງທ່ານ ຄາຊູຮີໂລະ ຄູໂນະ ອຸປະທູດຍີ່ປຸ່ນ ປະຈຳລາວ ແລະ ທ່ານ ຮິໂຣອາກິ ເຊກິ ຮອງປະທານອົງການ JMAS, ໂດຍມີທ່ານ ພູຂຽວ ຈັນທະສົມບູນ ຫົວໜ້າຫ້ອງ ການ ຄະນະກຳມະການຄຸ້ມຄອງແຫ່ງຊາດ ກ່ຽວກັບການແກ້ໄຂ ບັນຫາລະເບີດບໍ່ທັນແຕກ ທີ່ຕົກ ຄ້າງຢູ່ ສປປ ລາວ (NRA) ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂຄງການດັ່ງກ່າວ, ໄດ້ເລີ່ມຈັດຕັ້ງປະຕິບັດໃນປີຜ່ານມາ ໄດ້ເລັ່ງໃສ່ວຽກງານ ເກັບກູ້ລະເບີດທີ່ບໍ່ທັນ ແຕກ ເຊິ່ງການນຳໃຊ້ເຄື່ອງຈັກ ທຳລາຍລະເບີດລູກຫວ່ານ (CSCM) ນີ້ຍັງສາມາດ ເພີ່ມຄວາມປອດໄພ ແລະ ຫລຸດຜ່ອນ ເວລາ ໃນການປະຕິບັດວຽກງານ, ເຊິ່ງໃນ 10 ເດືອນຜ່ານມາ ສາມາດກວດກາ ພື້ນທີ່ໄດ້ເຖິງ 123 ເຮັກຕາ ແລະ ເກັບກູ້ລະເບີດໄດ້ແລ້ວ 802 ລູກ, ສຳລັບໂຄງການໄລຍະສອງນີ້ ອົງການ JMAS ມີແຜນຈະຂະຫຍາຍພື້ນທີ່ ການເກັບກູລະເບີດຈາກເມືອງແປກ ໄປຮອດເມືອງຄຳ ແລະ ເມືອງພູກູດ ພ້ອມທັງຈະເພີ່ມເຄື່ອງຈັກດັ່ງກ່າວ ໃຫ້ຫລາຍຂຶ້ນອີກ.
ອົງການເກັບກູລະເບີດ JMAS ໄດ້ຈັດຕັ້ງປະຕິບັດໂຄງການ ທີ່ກ່ຽວຂ້ອງກັບວຽກງານ ການເກັບກູ້ ລະເບີດໃນ ສປປ ລາວ ຢູ່ຫລາຍແຂວງ ເຊັ່ນ: ແຂວງຊຽງຂວາງ, ສາລະວັນ, ອັດຕະປື, ແຂວງຈຳປາສັກ ແລະ ນະຄອນຫລວງວຽງຈັນ.
ປະເທດລາວເປັນປະເທດໜຶ່ງ ທີ່ໄດ້ຮັບຜົນກະທົບຈາກລະເບີດບໍ່ທັນແຕກ ໃນໄລຍະຫລາຍປີຜ່ານມາ ມີຜູ້ໄດ້ຮັບເຄາະຮ້າຍເສຍຊີວິດ ແລະ ບາດເຈັບ ຈາກລະເບີດບໍ່ທັນແຕກ ເປັນຈໍານວນຫລວງຫລາຍ, ຄາດວ່າ 30% ຂອງລະເບີດລູກຫວ່ານ ທັງໝົດ 270 ລ້ານໜ່ວຍ ທີ່ຖືກຖິ້ມລົງໃນດິນແດນລາວ ໄລຍະສົງຄາມອິນດູຈີນ ແມ່ນຍັງບໍ່ທັນແຕກປະມານ 80 ລ້ານໜ່ວຍ ແລະ ໄດ້ຢາຍຢູ່ຕາມພື້ນທີ່ຕ່າງໆຂອງປະເທດ. ສະເພາະປີ 2017 ມີຜູ້ຮັບເຄາະຮ້າຍ ຈາກລະເບີດບໍ່ທັນແຕກແລ້ວ 20 ກວ່າຄົນ. ສໍາລັບປີຜ່ານມາມີຜູ້ບາດເຈັບ ຫລື ເສຍຊີວິດແລ້ວເກືອບ 60 ຄົນ. ນັກວິຊາການໄດ້ຄາດວ່າ 30% ຍັງເປັນໄພຂົ່ມຂູ່ ແລະ ກີດຂວາງຕໍ່ການພັດທະນາໃນ ສປປ ລາວ.
ຂ່າວ+ພາບ : ສຳນັກຂ່າວສານປະເທດລາວ
________
ປະກາດ ຮ່ວມສ້າງຄວາມສຸກສູ່ສັງຄົມລາວ
