ຂປລ.ວັນທີ 03 ມິຖຸນາ 2017 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງສາລະວັນ ເຊິ່ງມີ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ ພ້ອມດ້ວຍບັນດາຮອງເຈົ້າແຂວງ, ຄະນະພັກ-ຄະນະນຳແຂວງ ແລະ ພະແນກການອ້ອມຂ້າງ ໃຫ້ການຕ້ອນຮັບຢ່າງອົບອຸ່ນ.
ໂອກາດດັ່ງກ່າວ, ທ່ານ ທ່ານ ວິຊຽນ ນະວິກຸນ ຮອງເຈົ້າແຂວງໆສາລະວັນ ກໍ່ໄດ້ລາຍງານໃຫ້ຊາບ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະກວ່າ 5 ເດືອນ ຂອງສົກປີ 2017 ແລະ ການຈັດຕັ້ງປະຕິບັດຄຳສັ່ງເລກທີ 15 ຂອງນາຍົກລັດຖະມົນຕີ ເຊິ່ງໄດ້ຊີ້ໃຫ້ເຫັນລວມຍອດຜະລິດຕະພັນພາຍໃນ(GDP) ທີ່ສາມາດປະຕິບັດໄດ້ 3.800 ກວ່າຕື້ກີບ, ສາມາດເກັບລາຍຮັບໄດ້ກວ່າ 44 ຕື້ກີບ ເທົ່າກັບ 37% ດ້ານການລົງທຶນສາມາດປະຕິບັດໄດ້ກວ່າ 810 ຕື້ກີບ. ສໍາລັບດ້ານການຜະລິດກະສິກຳ ແມ່ນພວມສຸມໃສ່ ຜະລິດເຂົ້ານາປີ ໃນເນື້ອທີ່ກວ່າ 84 ພັນເຮັກຕາ ແລະ ສົ່ງເສີມການຜະລິດເປັນສິນຄ້າ ເປັນຕົ້ນ ກາເຟ, ສາລີ, ມັນຕົ້ນ, ມັນດ້າງ, ຖົ່ວດິນ ລວມເນື້ອທີ່ກວ່າ 49 ພັນເຮັກຕາ ແລະ ມີຄອບຄົວຕົວແບບໃນການລ້ຽງງົວ ແລະ ລ້ຽງໝູ 60 ກວ່າຄອບຄົວ. ສ່ວນການຈັດຕັ້ງປະຕິບັດຄຳສັ່ງເລກທີ 15 ຂອງນາຍົກລັດຖະມົນຕີ ແມ່ນສາມາດລົບລ້າງໂຮງງານໄດ້ 105 ແຫ່ງ ແລະ ດັດສົມເຫຼືອໂຮງງານ 58 ແຫ່ງ. ໃນນັ້ນ, ເປັນໂຮງງານປຸງແຕ່ງໄມ້ 22 ແຫ່ງ, ໂຮງງານເຟີນິເຈີ້ 17 ແຫ່ງ ແລະ ໂຮງຊ່າງຫັດຖະກຳແບບຄອບຄົວ 14 ແຫ່ງ ເຊິ່ງຍັງຈະສືບຕໍ່ປັບປຸງ ແລະ ດັດສົມຕື່ມອີກ ເພື່ອໃຫ້ຢູ່ໃນການຄຸ້ມຄອງທີ່ດີ ຕາມກຸ່ມພັດທະນາ ແລະ ຈັດຕັ້ງເປັນສະມາຄົມ ຕາມຄວາມເໝາະສົມ. ຜ່ານມາສາມາດກັກຢຶດໄມ້ໄດ້ 1.400 ກວ່າແມັດກ້ອນ, ໄດ້ປະມູນຂາຍແລ້ວ 1.200 ກວ່າແມັດກ້ອນ ມູນຄ່າກວ່າ 2,5 ຕື້ກີບ, ມີໄມ້ໃນສະໜາມ 2 ກວ່າ 6.900 ແມັດກ້ອນ, ປະມູນຂາຍແລ້ວ 3.300 ກວ່າແມັດກ້ອນ ແລະ ມີໄມ້ທີ່ບໍ່ມີເອກະສານກວ່າ 7.700 ແມັດກ້ອນ, ປະຈຸບັນ ບັນດາໂຮງງານ ໄດ້ຖອກພັນທະແລ້ວ 4,7 ກວ່າຕື້ກີບ.
ຫຼັງຈາກນັ້ນ, ທ່ານຮອງນາຍົກລັດຖະມົນຕີ ແລະ ຄະນະ ກໍ່ໄດ້ເດີນທາງໄປຢ້ງມຢາມ ໂຄງການປູກໄມ້ ວິກເປັນສິນຄ້າ ທີ່ເມືອງຕະໂອ້ຍ ຂອງບໍລິສັດ ສະໂຕລາ ເອັນໂຊ ຈຳກັດ ເຊິ່ງເປັນໂຄງການທີ່ ໄດ້ເລີ່ມມາ ສຳຫຼວດເນື້ອທີ່ສຳປະທານ ແລະ ທຳການບຸກເບີກເນື້ອທີ່ປູກ ມາແຕ່ປີ 2008 ໂດຍກວມເອົາ 3 ເມືອງ ທຸກຍາກ ຂອງແຂວງສາລະວັນ ຄື: ເມືອງຕຸ້ມລານ, ສະມ້ວຍ ແລະ ຕະໂອ້ຍ ໃນຈຳນວນ 23 ບ້ານ ໃນ ເນື້ອທີ່ປ່າເຫຼົ່າກວ່າ 900 ເຮັກຕາ ພ້ອມທັງການເກັບກູ້ລະເບີດບໍ່ທັນແຕກ ໃນປາງສົງຄາມ ເພື່ອ ໃຫ້ປະຊາຊົນມີຄວາມປອດໄພໃນການເຮັດວຽກ. ໂຄງການດັ່ງກ່າວ ໄດ້ປະກອບສ່ວນອັນສຳຄັນ ເຂົ້າ ໃນການສ້າງວຽກເຮັດງານທຳໃຫ້ແຕ່ລະຄອບຄົວ ໄດ້ພັດປ່ຽນກັນມາບົວລະບັດຮັກສາຕົ້ນວິກ ແລະ ສາມາດປູກພືດປະສົມປະສານ ເປັນຕົ້ນ ເຂົ້າ, ຜັກ ແລະ ມັນຕົ້ນ ເພື່ອຍົກລະດັບຊີວິດການເປັນຢູ່ ເຮັດໃຫ້ປະຊາຊົນ ມີລາຍຮັບ ແລະ ມີຜົນຜະລິດກະສິກຳ ຕື່ມອີກ.
ຊຶ່ງທາງໂຄງການ ມີແຜນຈະຂະຫຍາຍເນື້ອທີ່ໃຫ້ໄດ້ເກີນກວ່າ 4.000 ເຮັກຕາ ເພື່ອສະໜອງ ໃຫ້ແກ່ ໂຮງງານຜະລິດແຜ່ນໄມ້ອັດທີ່ທັນສະໄໝ ເພື່ອການຜະລິດເປັນສິນຄ້າສົ່ງອອກ. ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍ ຕໍ່ການຈັດຕັ້ງປະຕິບັດໂຄງການດັ່ງກ່າວ ເຊິ່ງໄດ້ປະກອບ ສ່ວນອັນສຳຄັນ ເຂົ້າໃນການຫຼຸດຜ່ອນຄວາມທຸກຍາກຂອງແຂວງ ໂດຍສະເພາະ ແມ່ນຂອງ 3 ເມືອງ ທີ່ມີຄອບຄົວທຸກຍາກຫຼາຍກວ່າໝູ່ໃນແຂວງ. ພ້ອມນີ້, ທ່ານກໍ່ເນັ້ນໃຫ້ໂຄງການ ຕ້ອງໄດ້ສົ່ງເສີມ ການປູກ - ການລ້ຽງ ຂອງປະຊາຊົນໃຫ້ຫຼາຍຂຶ້ນ ໄປຄຽງຄູ່ກັບການປູກໄມ້ວິກ ເພື່ອເປັນສິນຄ້າຕອບ ສະໜອງໃຫ້ແກ່ປະເທດໃກ້ຄຽງ ແລະ ຕົວເມືອງແຂວງສາລະວັນ, ຍົກລະດັບດ້ານສາທາລະນະສຸກ ຂອງປະຊາຊົນ, ສ້າງລະບົບຊົນລະປະທານໃນທ້ອງຖິ່ນ ເພື່ອສະໜອງໃຫ້ແກ່ການປູກ-ການລ້ຽງ ຂອງປະຊາຊົນ ແລະ ມີນ້ຳສະອາດໃຊ້, ສົມທົບກັບອຳນາດການປົກຄອງແຂວງ ຍົກລະດັບດ້ານວຽກງານ ບໍລິຫານໃຫ້ຂັ້ນບ້ານ ແລະ ເອົາໃຈໃສ່ຍົກລະດັບພື້ນຖານການສຶກສາ ໃຫ້ແກ່ປະຊາຊົນ.
ຂອບໃຈຂໍ້ມູນຂ່າວຈາກ: ຂປລ
________
ປະກາດ ຮ່ວມສ້າງຄວາມສຸກສູ່ສັງຄົມລາວ
