ຕາມການເປີດເຜີຍຂອງ ນາງ ສວນສະຫວັນ ວິຍະເກດ ກຳມະການຄະນະປະຈຳສະພາແຫ່ງຊາດ ເລຂາທິການສະພາແຫ່ງຊາດ ຮອງຫົວໜ້າຄະນະຊີ້ນຳລະດັບຊາດເພື່ອການກໍ່ສ້າງຫໍສະພາແຫ່ງຊາດຫຼັງໃໝ່ ກ່ຽວກັບການຮື້ຖອນຫໍສະພາແຫ່ງຊາດຫຼັງເກົ່າເພື່ອກໍ່ສ້າງຫໍສະພາແຫ່ງຊາດຫຼັງໃໝ່ ກ່າວຕໍ່ສື່ມວນຊົນໃນວັນສຸກຜ່ານມາວ່າ: ຜ່ານການນຳໃຊ້ຫໍສະພາແຫ່ງຊາດເຂົ້າໃນການປະຕິບັດໜ້າທີ່ວຽກງານຂອງສະພາແຫ່ງຊາດໃນໄລຍະ 26 ປີຜ່ານມາມີຫຼາຍຈຸດເກີດການເພພັງ ຊຸດໂຊມ, ຮົ່ວຊຶມເຊິ່ງແຕ່ລະປີຕ້ອງໄດ້ໃຊ້ງົບປະມານເຂົ້າໃນການສ້ອມແປງ.
ຜ່ານການຄົ້ນຄວ້າ, ປຶກສາຫາລືກ່ຽວກັບການສ້າງຫໍສະພາແຫ່ງຊາດຫຼັງໃໝ່ໄດ້ເລີ່ມມາແຕ່ສະພາແຫ່ງຊາດຊຸດທີ VI ແລະ VII ໂດຍໄດ້ຄົ້ນຄວ້າກ່ຽວກັບສະຖານທີ່ປຸກສ້າງ, ຮູບແບບຂອງອາຄານ, ທຶນຮອນໃນການກໍ່ສ້າງ, ເພື່ອສືບຕໍ່ຜັນຂະຫຍາຍທິດທາງ, ແຜນການດັ່ງກ່າວໂດຍໄດ້ຮັບການຕົກລົງຈາກສູນກາງພັກ, ສະພາແຫ່ງຊາດຊຸດທີ VIII ໄດ້ມີຄວາມກຽມພ້ອມໃນການປຸກສ້າງຫໍສະພາແຫ່ງຊາດຫຼັງໃໝ່ແທນຫໍສະພາແຫ່ງຊາດຫຼັງປະຈຸບັນທີ່ຈະຖືກຮື້ຖອນ
 |
| ທ່ານນາງສວນສະຫວັນ |
ທ່ານນາງສວນສະຫວັນ ກ່າວຕື່ມວ່າ: ຫໍສະພາແຫ່ງຊາດຕຶກໃໝ່ແມ່ນໄດ້ມີການອອກແບບຢ່າງເປີດກວ້າງໃຫ້ບໍລິສັດທີ່ມີຄວາມຊຳນານງານ, ມີປະສົບການດ້ານສະຖາປານິກເປັນຜູ້ອອກແບບ ເພື່ອໃຫ້ຄະນະກຳມະການກວດກາຄັດເລືອກ ພ້ອມກັນນັ້ນຄະນະຮັບຜິດຊອບໄດ້ວ່າຈ້າງບໍລິສັດຕ່າງປະເທດເປັນຜູ້ກວດກາແບບໃຫ້ມີຄວາມຮັບປະກັນດ້ານຄຸນນະພາບ.
ຫໍສະພາແຫ່ງຊາດຫຼັງໃໝ່ໄດ້ອອກແບບມາໃຫ້ເປັນອາຄານ 5 ຊັ້ນທີ່ມີລັກສະນະວັດທະນະທຳຂອງຊາດ, ສະຫງ່າງາມ ແລະທັນສະໄໝ, ແຂງແຮງທົນທານມີອາຍຸການໃຊ້ງານໄດ້ຫຼາຍກວ່າ 100 ປີ ແລະສະແດງເຖິງອົງການອຳນາດສູງສຸດແຫ່ງລັດ, ມີຄວາມສອດຄ່ອງກັບລັກສະນະຂອງລັດຖະສະພາ, ສະດວກໃຫ້ແກ່ການຮອງຮັບການປະຕິບັດໜ້າທີ່ຂອງສະພາແຫ່ງຊາດ.
ໃນນັ້ນປະກອບມີຫ້ອງກອງປະຊຸມໃຫຍ່ຂອງສະພາແຫ່ງຊາດ, ຫ້ອງໂຖງໃຫຍ່, ຫ້ອງກຽດຕິຍົດ, ຫ້ອງປະຊຸມຂະໜາດກາງ ແລະນ້ອຍ, ຫ້ອງເຮັດວຽກຂອງບັນດາຄະນະປະຈຳສະພາແຫ່ງຊາດ ແລະບັນດາຫ້ອງກະກຽມຮອງຮັບວຽກກອງປະຊຸມອື່ນໆ.
ສຳລັບທຶນຮອນໃນການກໍ່ສ້າງຫໍສະພາຫຼັງໃໝ່ນີ້ແມ່ນໄດ້ຮັບການຊ່ວຍເຫຼືອຈາກພັກ-ລັດ ແລະປະຊາຊົນຫວຽດນາມອ້າຍນ້ອງ ເປັນການປະກອບສ່ວນສຳຄັນໃນການເສີມສ້າງສາຍພົວພັນອັນເປັນມູນເຊື້ອ, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ.
________
ປະກາດ ຮ່ວມສ້າງຄວາມສຸກສູ່ສັງຄົມລາວ
