ກອງປະຊຸມ ສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ VIII ໄດ້ສຳເລັດລົງຢ່າງຈົບງາມ
------------------------------------
ຂປລ.ກອງປະຊຸມ ສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ VIII ໄດ້ສຳເລັດລົງ ຢ່າງຈົບງາມ ໃນວັນທີ 18 ພະຈິກ 2016 ນີ້ ທີ່ຫໍສະພາແຫ່ງຊາດ ພາຍຫລັງທີ່ໄດ້ດຳເດີນ ມາເປັນເວລາ 20 ວັນ ພາຍໃຕ້ການ ເປັນປະທານ ຂອງທ່ານນາງ ປານີ ຢ່າທໍ່ຕູ້ ປະທານສະພາແຫ່ງຊາດ, ໂດຍການໃຫ້ກຽດເຂົ້າຮ່ວມ ຂອງທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາ ຮອງປະທານສະພາ, ຄະນະລັດຖະບານ, ອະດີດການນຳຂັ້ນສູງ, ຜູ້ຕາງໜ້າອົງການຈັດຕັ້ງ ມະຫາຊົນ, ພ້ອມດ້ວຍສະມາຊິກ ສະພາແຫ່ງຊາດ ແລະ ສະມາຊິກ ສະພາຂັ້ນແຂວງ ເຂົ້າຮ່ວມ.
ໃນໂອກາດ, ກ່າວສູນທອນພົດ ປິດກອງປະຊຸມ ຢ່າງເປັນທາງການ ທ່ານນາງ ປານີ ຢ່າທໍ່ຕູ້ ປະທານສະພາແຫ່ງຊາດ ກ່າວວ່າ: ກອງປະຊຸມຄັ້ງນີ້, ມີຄວາມໝາຍ ຄວາມສຳຄັນຍິ່ງ, ກອງປະຊຸມໄດ້ພິຈາລະນາ ບັນຫາສຳຄັນຕ່າງໆ ຂອງຊາດ ເຊັ່ນ: ໄດ້ຮັບຮອງເອົາ ທ່ານ ພັນເອກ ອິນໂຮມ ຈັນສີນາ ເປັນສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງ ສະຫວັນນະເຂດ, ພິຈາລະນາ ແລະ ຮັບຮອງເອົາ ການສະເໜີການດັດແກ້ ຕົວເລກມະຫາພາກແຜນ 4 ປີ 2017-2020 ກ່ຽວກັບການ ພັດທະນາ ເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ, ການຈັດຕັ້ງປະຕິບັດ ແຜນປະຈໍາ ສົກປີ 2015-2016 ແລະ ປະຈໍາ ປີ 2017 ຕາມການສະເໜີ ຂອງລັດຖະບານ, ພິຈາລະນາ ແລະ ຮັບຮອງເອົາ ບົດລາຍງານການແກ້ໄຂ ຜົນການກວດສອບ ສົກປີ 2013-2014 ບົດສະຫລຸບ ຂາດຕົວການຈັດຕັ້ງ ປະຕິບັດງົບປະມານ ປະຈໍາ ສົກປີ 2014-2015 ແລະ ບົດສະຫລຸບການເຄື່ອນໄຫວ ຂອງອົງການ ກວດສອບແຫ່ງລັດ ປະຈໍາສົກປີ 2015-2016 ແລະ ແຜນປີ 2017, ພິຈາລະນາ ແລະ ຮັບຮອງເອົາບົດລາຍງານ ການຕິດຕາມກວດກາ ຂອງຄະນະປະຈໍາ ສະພາແຫ່ງຊາດ ກ່ຽວກັບການອອກ ນິຕິກໍາລຸ່ມກົດໝາຍ ຂອງອົງການອໍານາດລັດ ແລະ ການຕິດຕາມກວດກາ ຜົນກະທົບຕໍ່ສິ່ງແວດລ້ອມ ແລະ ທໍາມະຊາດ ຈາກການໃຊ້ສານເຄມີ ອັນຕະລາຍເກີນ ຕາມມາດຕະຖານ, ຮັບຮອງເອົາບົດລາຍງານ ການເຄື່ອນໄຫວວຽກງານ 5 ປີ 2011-2015 ວຽກງານປະຈໍາປີ 2016 ແລະ ທິດທາງແຜນການ ເຄື່ອນໄຫວວຽກງານ 5 ປີ 2016-2020 ວຽກງານຈຸດສຸມປີ 2017 ຂອງອົງການໄອຍະການ ປະຊາຊົນສູງສຸດ ແລະ ສານປະຊາຊົນສູງສຸດ, ຮັບຮອງບົດລາຍງານ ການເຄື່ອນໄຫວວຽກງານ ຂອງສະພາແຫ່ງຊາດ ໃນ 6 ເດືອນທ້າຍ ປີ 2016 ແລະ ທິດທາງແຜນການປີ 2017, ກອງປະຊຸມ ໄດ້ຄົ້ນຄ້ວາ ພິຈາລະນາກົດໝາຍ ຈໍານວນ 14 ສະບັບ ໃນນັ້ນ ກົດໝາຍສ້າງໃໝ່ 2 ສະບັບ, ກົດໝາຍປັບປຸງ 12 ສະບັບ ແລະ ກົດໝາຍທາບທາມ 1 ສະບັບ.
ພ້ອມນີ້ ກອງປະຊຸມ ຍັງໄດ້ຮັບຟັງ ການຕອບຄໍາຖາມຈາກ 9 ກະຊວງ, ອົງການທຽບເທົ່າ ຕໍ່ກັບບັນຫາພົ້ນເດັ່ນ ທີ່ສັງຄົມມີຄວາມສົນໃຈ ເຊິ່ງນອນໃນຄວາມຮັບຜິດຊອບ ຂອງຂະແໜງການເປັນຕົ້ນ ຂົງເຂດເສດຖະກິດ-ແຜນການ, ການເງິນ-ເງິນຕາ, ສິ່ງແວດລ້ອມ ແລະ ສັງຄົມ ພິເສດກອງປະຊຸມ ໄດ້ຮັບຟັງ ທ່ານ ນາຍົກລັດຖະມົນຕີ ລາຍງານເພີ່ມເຕີມ ແລະ ເນັ້ນບາງນະໂຍບາຍ ແລະ ມາດຕະການ ທີ່ຈໍາເປັນຮີບດ່ວນຈໍານວນໜຶ່ງ ເພື່ອຮັບປະກັນ ການແກ້ໄຂສະພາບ ຄວາມຫຍຸ້ງຍາກທາງດ້ານ ເສດຖະກິດ-ການເງິນ, ການລົງທຶນ ໃນປັດຈຸບັນ ກໍຄື ການປັບປຸງ ສະພາບແວດລ້ອມ ແລະ ບັນຍາກາດ ຂອງການລົງທຶນ ແລະ ການດໍາເນີນທຸລະກິດ, ການສົ່ງເສີມ ຜະລິດເປັນສິນຄ້າ ແລະ ການບໍລິການຕາມທ່າແຮງ ຂອງຂະແໜງການ ແລະ ທ້ອງຖິ່ນ, ການປັບປຸງກົງຈັກ ການຈັດຕັ້ງ ກໍຄື ກົນໄກບໍລິຫານລັດ ໃຫ້ມີປະສິດທິພາບ, ມີປະສິດທິຜົນ ແລະ ການແກ້ໄຂການລະເມີດວິໄນ ແຜນການ-ການເງິນ ໃນບາງຫົວໜ່ວຍ ງົບປະມານຂອງລັດ./.
