ລາຍງານຈາກຄະນະສະເພາະກິດໃຫ້ຮູ້ວ່າ ຜົນສຳເລັດຄັ້ງຍິ່ງໃຫຍ່ຂອງສປປລາວ ທີ່ປິ່ນປົວຄົນຕິດເຊື້ອພະຍາດໂຄວິດ-19 ໄດ້ສຳເລັດໝົດແລ້ວ
ກໍລະນີທີ 8 ເພດຊາຍ ອາຍຸ 18 ປີ ບ້ານດອນນົກຂຸ້ມ ເມືອງສີສັດຕະນາກ ນະຄອນຫລວງວຽງຈັນ ເຂົ້າປິ່ນປົວຢູ່ໂຮງໝໍມິດຕະພາບ ວັນທີ 28/3/2020 ໄດ້ປິ່ນປົວດີ ແລະ ໄດ້ອອກໂຮງໝໍມື້ນີ້ 9/6/2020 ເປັນຄົນສຸດທ້າຍ.
ມາຮອດມື້ນີ້ 9 ມິຖຸນາ 2020 ສປປ ລາວ ບໍ່ມີຜູ້ຕິດເຊື້ອ ໂຄວິດ 19 ເພີ່ມ 58 ມື້ຕິດຕໍ່ກັນ, ສ່ວນຜູ້ປ່ວຍທີ່ປິ່ນປົວຢູ່ໂຮງໝໍມິດຕະພາບ ຄົນສຸດທ້າຍ ເພດຊາຍ (ກໍລະນີທີ 8) ໄດ້ເກັບຕົວຢ່າງມາກວດວິເຄາະ 2 ຄັ້ງຕິດຕໍ່ກັນ ຜົນເປັນລົບ ໄດ້ອອກໂຮງໝໍໃນມື້ນີ້ 9 ມິຖຸນາ 2020 ເພື່ອໄປກັກບໍລິເວນຕົວເອງຢູ່ເຮືອນ 14 ວັນ. ເຊິ່ງກໍລະນີທີ 8 ເຂົ້າໂຮງໝໍ ເມື່ອວັນທີ 28 ມີນາຜ່ານມາ ໃຊ້ເວລາປິ່ນປົວ 74 ວັນ. ປະຈຸບັນ ຜູ້ຕິດເຊື້ອ ໂຄວິດ-19 ຢູ່ ສປປ ລາວ ທັງໝົດ 19 ຄົນ ແມ່ນປິ່ນປົນຫາຍດີ ແລະ ອອກໂຮງໝໍໝົດແລ້ວ ໂດຍເວລາປິ່ນປົວທັງໝົດ 78 ວັນ ນັບແຕ່ກວດພົບກໍລະນີທີ 1 ເມື່ອວັນທີ 24 ມີນາຜ່ານມາ.
ທ່ານ ຮສ.ດຣ ບຸນກອງ ສີຫາວົງ, ລມຕ ກະຊວງສາທາລະນະສຸກ ໄດ້ສະແດງຄວາມຊົມຊົມເຊີຍຕໍ່ຄະນະແພດໝໍ-ພະຍາບານ ໂຮງຫມໍມິດຕະພາບ ທີ່ໄດ້ອຸທິດເຫື່ອແຮງ ສະຕິປັນຍາ ເຂົ້າໃນການປິ່ນປົວ ຄົນເຈັບໄດ້ຮັບຜົນສໍາເລັດເປັນຢ່າງດີ, ພ້ອມນັ້ນ ທ່ານຍັງເນັ້ນໃຫ້ເອົາໃຈໃສ່ຕື່ມ ເຖິງວ່າຈະບໍ່ມີຄົນເຈັບນອນປິ່ນປົວກໍຕາມ ແຕ່ໂຮງຫມໍຍັງຕ້ອງສືບຕໍ່ພາລະບົດບາດ ໃນການເຝົ້າລະວັງ, ຄັດກອງຄົນເຈັບ ແລະ ກຽມພ້ອມຮັບຄົນເຈັບຖ້າມີກໍລະນີເກີດຄືນໃຫມ່ໃນຕໍ່ຫນ້າ.
• ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 8 ມິຖຸນາ 2020, ໄດ້ເກັບຕົວຢ່າງມາກວດວິເຄາະທັງໝົດ 319 ຄົນ, ໃນນັ້ນ ແຮງງານລາວກັບມາແຕ່ໄທ 227 ຄົນ, ແຮງງານຈີນ 77 ຄົນ, ກໍລະນີສົງໄສ 14 ຄົນ ແລະ ຜູ້ຕິດເຊື້ອນອນປິ່ນປົວຢູ່ໂຮງໝໍມິດຕະພາບ 1 ຄົນ (ກໍລະນີທີ 8).
• ຜົນກວດຂອງ ແຮງງານລາວ, ແຮງງານຈີນ ແລະ ກໍລະນີສົງໄສ ທີ່ກວດມື້ວານນີ້ ບໍ່ພົບເຊື້ອ.
• ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 08 ມິຖຸນາ 2020 ໄດ້ເກັບຕົວຢ່າງມາກວດທັງໝົດ 8,926 ຕົວຢ່າງ, ກວດພົບເຊື້ອສະສົມ 19 ຄົນ (58 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
• ການຕິດຕາມຜູ້ຖືກຈຳກັດບໍລິເວນຢູ່ໃນສະຖານທີ່ ທີ່ກຳນົດໄວ້ໃນຂອບເຂດທົ່ວປະເທດ
• ປະຈຸບັນນີ້ທົ່ວປະເທດ ມີສູນຈໍາກັດບໍລິເວນ ທັງໝົດ 80 ສູນ, ມີຜູ້ຖືກຈຳກັດບໍລິເວນຢູ່ສູນ 3,262 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ພົບຜູ້ຕິດເຊື້ອ.
